اسلام آباد ( پاک ترک نیوز) بانی پی ٹی آئی عمران خان کی ہسپتال منتقلی کے معاملے پر ان کی ہمشیرہ عظمیٰ خان نے سپریم کورٹ میں توہین عدالت کی درخواست پر فوری سماعت کے لیے ایک اور درخواست دائر کردی۔درخواست میں مؤقف اختیار کیا گیا ہے کہ عمران خان کی صحت جیل میں بگڑ رہی ہے اور سپریم کورٹ کے حکم کی مبینہ خلاف ورزی کرتے ہوئے انہیں پمز اسپتال منتقل کیا گیا۔
درخواست میں کہا گیا ہے کہ بانی پی ٹی آئی کی صحت اور زندگی کا معاملہ انتہائی اہم ہے، انہیں طبی معائنے اور علاج کے لیے شفا انٹرنیشنل اسپتال منتقل کیا جائے۔عظمیٰ خان نے مؤقف اپنایا کہ سپریم کورٹ کے 18 اگست کے حکم پر جان بوجھ کر اس کی اصل روح کے مطابق عمل درآمد نہیں کیا گیا۔ عدالت کے حکم پر فوری اور مکمل عمل درآمد یقینی بنایا جائے۔
درخواست میں کہا گیا ہے کہ عدالتی حکم پر مسلسل عمل نہ کرنا ارادی، صریح اور قانون شکنی کے زمرے میں آتا ہے۔درخواست گزار کے مطابق کیسز فکسیشن پالیسی توہین عدالت کی درخواست پر فوری سماعت میں رکاوٹ نہیں بن سکتی۔ اس سے قبل 25 اگست کو فوری سماعت کی درخواست مسترد کی گئی تھی، تاہم یہ واضح نہیں کیا گیا کہ درخواست چیف جسٹس نے مسترد کی یا کس بنیاد پر فیصلہ ہوا۔
یہ بھی پڑھیں: فیلڈ مارشل کا دورہ ایران صدر ٹرمپ کے نمائندے کی حیثیت سے نہیں تھا، ترجمان دفتر خارجہ
عظمیٰ خان نے استدعا کی ہے کہ توہین عدالت کی درخواست کو فوری سماعت کے لیے مقرر کیا جائے اور رواں یا آئندہ ہفتے اس پر سماعت کی جائے۔
