اسلام آباد ( پاک ترک نیوز) رحمت اللعالمین، خاتم النبیین، سرور کونین، سردارِ دو جہاں حضرت محمد ﷺ کی ولادت باسعادت کا جشن ملک بھر میں مذہبی جوش و عقیدت سے منایا جا رہا ہے۔
شہر شہر، قریہ قریہ ذکرِ مصطفیٰ ﷺ سے فضا معطر ہے، میلاد اور درود و سلام کی محافل جاری ہیں، جبکہ ہر طرف خوشیوں کا اظہار کیا جا رہا ہے۔گلیاں، محلے اور بازار برقی قمقموں سے روشن ہیں، گھروں اور عمارتوں پر چراغاں کیا گیا ہے، جبکہ محرابیں اور آرائشی دروازے بھی سجائے گئے ہیں۔ خانہ کعبہ اور مسجد نبوی ﷺ کے ماڈلز بنا کر بھی عقیدت و محبت کا اظہار کیا گیا۔
عید میلاد النبی ﷺ کے دن کا آغاز وفاقی دارالحکومت میں 31 اور صوبائی دارالحکومتوں میں 21،21 توپوں کی سلامی سے ہوا۔ملک بھر میں جشنِ میلاد کے سلسلے میں جلوس، ریلیاں اور سیمینارز منعقد کیے جا رہے ہیں، جہاں علمائے کرام نبی کریم ﷺ کی سیرتِ مبارکہ اور اسوۂ حسنہ پر روشنی ڈالیں گے۔کراچی میں مرکزی جلوس دوپہر ڈھائی بجے برآمد ہوگا، جس کے باعث ایم اے جناح روڈ عام ٹریفک کے لیے بند رہے گا۔
یہ بھی پڑھیں: جشنِ عید میلاد النبی ﷺ ، نورِ مصطفیٰ ﷺ سے جگمگاتا پاکستان
مرکزی سیرت النبی ﷺ کانفرنس آج اسلام آباد میں منعقد ہوگی، جس میں علماء اور مذہبی اسکالرز نبی کریم ﷺ کی تعلیمات اور سیرتِ طیبہ کے مختلف پہلوؤں پر اظہارِ خیال کریں گے۔
