بیجنگ ( پاک ترک نیوز) چین کے مقامی طور پر تیار کردہ C919 مسافر طیارے نے اپنی پہلی بین الاقوامی کمرشل پرواز مکمل کرلی، جسے عالمی ایوی ایشن مارکیٹ میں چین کی اہم پیش رفت قرار دیا جا رہا ہے۔
چینی سرکاری کمپنی کمرشل ایئرکرافٹ کارپوریشن آف چائنا یعنی COMAC کا تیار کردہ C919 طیارہ ایئر چائنا کے زیرِ انتظام بدھ کو بیجنگ سے منگولیا کے دارالحکومت اولان باتر پہنچا۔
طیارے نے بیجنگ سے مقامی وقت کے مطابق سہ پہر 3 بج کر 17 منٹ پر اڑان بھری اور تقریباً ایک گھنٹہ 40 منٹ بعد 4 بج کر 58 منٹ پر اولان باتر میں لینڈ کیا۔
ایئر چائنا اس روٹ پر روزانہ ایک دو طرفہ پرواز چلائے گی، جس کے ذریعے بیجنگ اور اولان باتر کو براہِ راست ملایا جائے گا۔
C919 کو بوئنگ 737 اور ایئربس A320 کا ممکنہ حریف قرار دیا جاتا ہے، تاہم اسے اب تک امریکا اور یورپ کے متعلقہ ریگولیٹری اداروں سے کمرشل آپریشن کی منظوری نہیں ملی۔
چین کو امید ہے کہ مقامی طور پر تیار کیا گیا یہ طیارہ غیر ملکی ٹیکنالوجی پر انحصار کم کرنے کے ساتھ ساتھ عالمی مسافر طیاروں کی مارکیٹ میں چین کے لیے جگہ بنانے میں بھی مددگار ثابت ہوگا۔
یہ بھی پڑھیں: لیتھیم کا متبادل؟ سوڈیم آئن بیٹری سے دنیا حیران
C919 مکمل طور پر چین میں تیار کیا جاتا ہے، تاہم اس کے مختلف پرزے امریکا سمیت متعدد ممالک سے حاصل کیے جاتے ہیں۔
C919 نے اپنی پہلی کمرشل پرواز مئی 2023 میں شنگھائی سے بیجنگ کے درمیان مکمل کی تھی، جس کے بعد اسے چین کے اندر مختلف کمرشل روٹس اور مین لینڈ چین و ہانگ کانگ کے درمیان پروازوں کے لیے استعمال کیا جا رہا ہے۔
COMAC اس سے قبل C919 کو 2024 اور 2026 کے سنگاپور ایئر شو جبکہ 2025 کے دبئی ایئر شو میں بھی پیش کرچکی ہے۔
چین چھوٹے C909 طیارے کے ذریعے پہلے ہی عالمی مارکیٹ میں قدم رکھ چکا ہے، جس میں 78 سے 97 مسافروں کے بیٹھنے کی گنجائش ہے۔
C919 کی پہلی بین الاقوامی کمرشل پرواز کو چین کی جانب سے بوئنگ اور ایئربس کی طویل عرصے سے جاری عالمی بالادستی کو چیلنج کرنے کی کوشش میں ایک اہم علامتی قدم قرار دیا جا رہا ہے۔
