اسلام آباد (پاک ترک نیوز )صدر مملکت کے قانونی مشیر عرفان قادر نے سپیکر قومی اسمبلی سردار ایاز صادق سے اہم ملاقات کی، جس میں ججز کی تقرری سے متعلق پیدا ہونے والے تنازع پر تفصیلی گفتگو کی گئی۔
ملاقات میں وفاقی وزیر قانون اعظم نذیر تارڑ اور میئر کراچی مرتضیٰ وہاب بھی موجود تھے۔
ملاقات کے بعد میڈیا سے گفتگو کرتے ہوئے عرفان قادر نے کہا کہ ججز تقرری کے معاملے پر مشاورت جاری ہے اور امید ہے کہ یہ مشاورت کامیاب ہوگی۔
ان کا کہنا تھا کہ سب مل جل کر مسئلے کا حل تلاش کر رہے ہیں، ان شاء اللہ سب ٹھیک ہو جائے گا۔
یہ بھی پڑھیں :قومی اسمبلی میں وفاقی وزیر رانا تنویر اور پی ٹی آئی ارکان میں تلخ کلامی
صدر مملکت کے قانونی مشیر نے کہا کہ سپیکر قومی اسمبلی بھی اس معاملے میں اپنا کردار ادا کر رہے ہیں۔ معاملہ عدالت میں زیرِ التوا ہے، اس لیے وہ اس پر مزید بات نہیں کرنا چاہتے۔
عرفان قادر کا کہنا تھا کہ تمام اقدامات ملک اور عوام کی بہتری کے لیے کیے جا رہے ہیں۔
انہوں نے مزید کہا کہ اس طرح کے مسائل قانونی طریقے سے حل ہو جائیں گے اور وہ ہمیشہ پرامید رہتے ہیں۔
