لاہور( پاک ترک نیوز) وزیراعلیٰ پنجاب مریم نواز نے صوبے میں تعلیم کے فروغ کے لیے بڑے تعلیمی پیکج کا اعلان کرتے ہوئے طلبہ کو ایک لاکھ مفت الیکٹرک بائیکس، ایک لاکھ لیپ ٹاپ اور 50 ہزار میرٹ اسکالرشپس دینے کا اعلان کیا ہے۔
وزیراعلیٰ نے کہا کہ پنجاب کے ہر تحصیل میں نواز شریف اسکول قائم کیے جائیں گے، جبکہ جدید سہولیات سے آراستہ 300 نئے اسکول بھی تعمیر کیے جائیں گے۔
انہوں نے بتایا کہ سرکاری اسکولوں کی بہتری کے لیے 40 ارب روپے مختص کیے گئے ہیں، جن سے کلاس رومز کی اپ گریڈیشن، نئے فرنیچر، صاف پانی، بہتر واش رومز، اور آرٹیفیشل انٹیلی جنس (AI)، انفارمیشن ٹیکنالوجی (IT) اور جدید سائنس لیبارٹریاں قائم کی جائیں گی۔
مریم نواز نے یہ بھی اعلان کیا کہ طلبہ کو محفوظ سفری سہولت فراہم کرنے کے لیے گرین الیکٹرک بس سروس کا دائرہ کار مزید وسیع کیا جائے گا تاکہ زیادہ سے زیادہ طلبہ اس سے مستفید ہو سکیں۔
یہ بھی پڑھیں: خیبر پختونخوا میں بارشوں سے تباہی ،لاہور میں رم جھم
وزیراعلیٰ نے والدین سے اپیل کی کہ حالیہ مون سون بارشوں کے دوران بچوں کو ندی نالوں، برساتی پانی اور دیگر خطرناک مقامات سے دور رکھیں تاکہ کسی بھی ناخوشگوار واقعے سے بچا جا سکے۔
