امریکی پابندیوں نے چینی چپ انڈسٹری کو مضبوط بنا دیا، ہواوے چیئرمین

بیجنگ (پاک ترک نیوز )چینی ٹیکنالوجی کمپنی ہواوے کے اعلیٰ عہدیدار نے حیران کن بیان دیتے ہوئے کہا ہے کہ امریکی چپ پابندیوں نے چین کی سیمی کنڈکٹر صنعت کو کمزور کرنے کے بجائے مزید مضبوط بنا دیا ۔
ہواوے کے روٹیٹنگ چیئرمین شو ژی جون نے ایک انٹرویو میں کہا کہ امریکا کی جانب سے عائد کی جانے والی پابندیوں نے چینی کمپنیوں کو اپنی ٹیکنالوجی اور چپ سازی کے شعبے میں خود انحصاری حاصل کرنے پر مجبور کیا، جس کے مثبت نتائج اب سامنے آ رہے ہیں۔
ان کا کہنا تھا کہ اگر امریکہ چین اور چینی کمپنیوں پر دباؤ نہ ڈالتا تو شاید مقامی سطح پر اتنی تیزی سے جدت اور تحقیق و ترقی کا عمل شروع نہ ہوتا۔ انہوں نے کہا کہ آج چین کی سیمی کنڈکٹر سپلائی چین پہلے سے کہیں زیادہ مضبوط ہو رہی ہے اور اس شعبے کو حکومتی اور عوامی حمایت بھی حاصل ہے۔
یاد رہے کہ 2019 میں امریکی حکومت نے ہواوے سمیت متعدد چینی ٹیکنالوجی کمپنیوں پر پابندیاں عائد کی تھیں، جبکہ بعد ازاں جدید مصنوعی ذہانت اور ہائی پرفارمنس چپس کی چین کو برآمد پر بھی سخت پابندیاں نافذ کی گئیں۔