ہمارا ایٹمی پروگرام محفوظ ، کوئی بھی نشانہ بنانے کی جرات نہیں کر سکتا ، ترجمان پاک فوج

راولپنڈی ( آئی پاک ٹی وی ) پاک فوج کے ترجمان لیفٹیننٹ جنرل احمد شریف چوہدری کاکہنا ہے کہ بھارت نے دہشتگردی کو پالیسی کے طور پر پاکستان کیخلاف اپنایا ہوا ہے۔
ڈی جی آئی ایس پی آر لیفٹیننٹ جنرل احمد شریف چوہدری نے الجزیرہ ٹی وی کو انٹرویو دیتے ہوئے کہا کہ بھارتی سرپرستی میں ہونے والی دہشتگرد ی کے نیٹ ورک کا ماسٹر مائنڈ اجیت دوول ہے ،امریکا اور کینیڈا سمیت کئی ممالک بھارتی ریاستی دہشتگردی کا اعتراف کر چکے ہیں۔
ترجمان پاک فوج کا کہنا تھا کہ بھارت کے مذموم عزائم بلوچستان کو غیر مستحکم کرنے کی منظم سازش ہے،خوارج کی اصطلاح ریاست اور فوج پر حملہ آور ہونے والے مسلح گروہوں کیلئے استعمال کی جا رہی ہے، موجودہ فتنہ الخوارج اس گمراہ کن نظریے کا تسلسل ہے۔
ڈی جی آئی ایس پی آر نے مزید کہا کہ اسلام میں جہاد یا قتال کا اختیار صر ف ریاست کے پاس ہے، کسی فرد ، تنظیم یا گروہ کو جہاد یاقتال کا اختیار نہیں، فتنہ الخوارج کا اسلام، انسانیت ، پاکستان یا پاکستانی روایات سے کوئی تعلق نہیں۔
انہوں نے کہا کہ فتنہ الہندوستان کی اصطلاح بھارتی حمایت یافتہ دہشتگردوں کیلئے استعمال ہوتی ہے، فتنہ الہندوستان خاص طور پر بلوچستان میں ملک کو غیر مستحکم کرنے کیلئے سرگرم ہیں۔ بھارتی سیاسی قیادت متعدد مواقع پر پاکستان میں دہشتگردی کی پشت پناہی کا اعتراف کر چکی ہے۔
لیفٹیننٹ جنرل احمد شریف چوہدری کا کہنا تھا کہ پاکستان ایک ذمہ دار اور ڈکلئیرڈ ایٹمی طاقت ہے جس کی جوہری صلاحیت ناقابل تسخیر ہے، پاکستان کا ایٹمی پروگرام مکمل طور پر محفوظ ہے اور کوئی بھی پاکستان کے ایٹمی پروگرام کو نشانہ بنانے کی جرات نہیں کر سکتا، یہ پاکستان کی دفاعی صلاحیتوں اور موجودہ علاقائی توازن پر اعتماد کی عکاسی کرتا ہے۔
انہوں نے مزید کہا کہ پاکستان نے اسلامی ریاست کے خلاف کسی بھی جارحیت کوعلاقائی استحکام کے لیے خطرہ قراردیا ہے، ڈی جی آئی ایس پی آر نے ایران کے لیے پاکستان کی سیاسی اور سفارتی حمایت کا اعادہ کیا۔