اسلام آباد(پاک ترک نیوز ) پاکستان نے یوکرین کے صدر ولادیمیر زیلنسکی کا یوکرین روس جنگ میں پاکستانیوں کی شرکت کا الزام مسترد کرتے ہوئے یوکرین سے وضاحت طلب کرنے کا فیصلہ کر لیا۔
دفتر خارجہ کی جانب سے بیان میں کہا گیا ہے کہ یوکرینی حکام نے اپنے دعوے کے حوالے سے کوئی قابل تصدیق ثبوت فراہم نہیں کیے اور نہ ہی باضابطہ طور پر آگاہ کیا گیا ہے، یوکرین کے حکام سے اس معاملے پر وضاحت طلب کی جائے گی۔
وزارت خارجہ نے واضح کیا کہ یوکرین کے تنازع میں پاکستانی شہریوں کے ملوث ہونے کے الزامات کو مسترد کرتے ہیں، حکومت پاکستان یہ معاملہ یوکرینی حکام کے ساتھ اٹھائے گی۔
ترجمان دفتر خارجہ نے کہا کہ پاکستان اقوام متحدہ کے چارٹر کے اصولوں کے مطابق مذاکرات اور سفارت کاری کے ذریعے یوکرین تنازع کے پرامن حل کے لیے اپنے عزم کا اعادہ کرتا ہے۔
یاد رہے کہ یوکرین کے صدر ولادیمیر زیلنسکی نے الزام لگایا ہے کہ شمال مشرقی یوکرین میں روس کی طرف سے چین، تاجکستان، ازبکستان، پاکستان اور افریقی ممالک کے کرائے کے سپاہی حصہ لے رہے ہیں، ہم اس کا جواب دیں گے۔
زیلنسکی اس سے پہلے بھی ماسکو پر یوکرین کے خلاف جنگ میں چینی جنگجو بھرتی کرنے کا الزام لگا چکے ہیں، جس کی بیجنگ نے تردید کی، زیلنسکی نے شمالی کوریا پر بھی یہی الزام لگایا تھا۔
یوکرین جنگ میں پاکستانیوں کی شمولیت کا الزام مسترد، وضاحت طلب کرنے کا فیصلہ
