اسلام آباد(پاک ترک نیوز )سربراہ پاک بحریہ ایڈمرل نوید اشرف کی زیرِ صدارت پاک بحریہ کی کمانڈ اینڈ اسٹاف کانفرنس ہوئی جس میں بحری شعبے کو درپیش روایتی و غیر روایتی خطرات اور اسٹریٹجک چوک پوائنٹس کی سکیورٹی صورتحال کا تفصیلی جائزہ لیا گیا۔
کانفرنس میں خطے میں امن و استحکام اور بحری سلامتی کے حوالے سے پاک بحریہ کے کلیدی کردار پر بھی تفصیلی تبادلہ خیال کیا گیا۔
نیول چیف ایڈمرل نوید اشرف نے پاک بحریہ کی ہمہ وقت جنگی تیاریوں کا تسلسل برقرار رکھنے پر زور دیتے ہوئے کہا کہ میری ٹائم سیکیورٹی چیلنجز سے نمٹنے کے لیے جدید ہتھیاروں اور ٹیکنالوجی کا حصول ناگزیر ہے۔
کانفرنس کے دوران نیول چیف کو پاک بحریہ کے جاری اور مستقبل کے منصوبوں پر بھی بریفنگ دی گئی۔
ایڈمرل نوید اشرف نے ملکی بحری سرحدوں کے دفاع کے لیے پاک بحریہ کی آپریشنل تیاریوں پر اطمینان کا اظہار کیا اور بدلتے ہوئے میری ٹائم سیکیورٹی ماحول کے تناظر میں بھرپور تیاری برقرار رکھنے کی ہدایت کی۔
