راولپنڈی(پاک ترک نیوز )راولپنڈی میں سگنل فری کوریڈور منصوبے کے تحت تین نئے انڈر پاسز کی تعمیر ستمبر کے پہلے ہفتے میں شروع کرنے کا فیصلہ کیا گیا ہے۔
ذرائع کے مطابق پشاور روڈ پر قاسم مارکیٹ چوک، چیرنگ کراس چوک اور قبرستان چوک پر انڈر پاسز تعمیر کیے جائیں گے۔
انڈر پاسز کی تعمیر سے قبل متعلقہ مقامات پر بجلی، گیس، پانی اور دیگر سروسز کی منتقلی کا کام آخری مرحلے میں داخل ہوگیا ہے، جبکہ ٹریفک کی روانی برقرار رکھنے کے لیے متبادل راستے بھی تیار کرلیے گئے ہیں۔
ذرائع کے مطابق یہ منصوبہ کچہری چوک سے چنگی نمبر 26 اور موٹروے چوک تک سگنل فری کوریڈور کے آخری مرحلے کا حصہ ہے۔
اسی منصوبے کے تحت پشاور روڈ پر گولڑہ موڑ کے مقام پر ایک انڈر پاس پہلے ہی تعمیر کیا جاچکا ہے، جبکہ کچہری چوک، ٹی ایم چوک اور جی پی او چوک پر انڈر پاسز اور فلائی اوورز مکمل کرکے ٹریفک کے لیے کھولے جاچکے ہیں۔
سگنل فری کوریڈور مکمل ہونے کے بعد کچہری چوک سے موٹروے چوک تک سفر کا دورانیہ کم ہوکر تقریباً 20 منٹ رہ جائے گا۔
منصوبے سے راولپنڈی سے اسلام آباد انٹرنیشنل ایئرپورٹ سمیت اسلام آباد، لاہور، پشاور اور ہزارہ موٹرویز تک آمدورفت مزید آسان ہونے کی توقع ہے۔
محکمہ مواصلات و تعمیرات کے ذرائع کے مطابق تعمیراتی کام کے دوران ٹریفک کی روانی برقرار رکھنے کے لیے متبادل ٹریفک پلان پر عملدرآمد کیا جائے گا۔
