لاہور(پاک ترک نیوز ) وزیراعظم شہباز شریف نے عطیات کے عالمی دن کی مناسبت سے قوم سے سیلاب متاثرین کے لیے امداد و تعاون بڑھانے کی اپیل کر دی۔
تفصیلات کےمطابق وزیراعظم محمد شہباز شریف نے عطیات کے عالمی دن کے موقع پر اپنے خصوصی پیغام میں کہا ہے کہ پاکستان دنیا کے ساتھ ہم آواز ہو کر آج کے دن معاشرتی فلاح و بہبود، امداد و عطیات اور باہمی رواداری کی اہمیت کو اجاگر کرتا ہے۔
وزیراعظم نے کہا ہے کہ پاکستان کی معاشرتی تاریخ اس بات کی گواہ ہے کہ پاکستانی قوم بلا رنگ و نسل، بلا تعصب دوسروں کی بے لوث مدد میں ہمیشہ پیش پیش رہی ہے، یہ جذبۂ خدمت نہ صرف ہماری سماجی و معاشرتی اقدار کا حصہ ہے بلکہ اسلامی تعلیمات اور ہماری تہذیب کی بھی روشن علامت ہے۔
شہباز شریف نے کہا کہ پاکستان کے رضاکار اور خدمت گزار افراد نے ہر مشکل وقت (قدرتی آفات، حادثات، جنگ یا ایمرجنسی حالات) میں اپنے اہل وطن کی عملی اور مالی مدد کرکے انسانیت کی خدمت کی اعلیٰ مثالیں قائم کی ہیں۔
وزیراعظم نے اس بات پر بھی فخر کا اظہار کیا کہ پاکستانی عوام کی فلاحی کاموں اور عطیات میں شرکت کی بدولت پاکستان دنیا کے ان ممالک میں شمار ہوتا ہے جو سب سے زیادہ عطیات دینے والے ہیں۔
انہوں نے مخیر حضرات کی خدمات کو سراہتے ہوئے کہا کہ مفت علاج، دسترخوان، ایمبولینس سروسز جیسے بے شمار فلاحی منصوبے ان کی عطیات کی بدولت کامیابی سے جاری ہیں، جو معاشرتی فلاح کا منہ بولتا ثبوت ہیں۔
شہباز شریف کا کہنا تھا ہمیں فخر ہے کہ ہمارے معاشرے میں بےلوث خدمت، دوسروں کی امداد اور فلاحی کاموں میں شرکت کو قدر کی نگاہ سے دیکھا جاتا ہے، عوام، تنظیمیں اور ادارے اس جذبے کو مزید مضبوط کریں اور ایک ایسا معاشرہ تشکیل دیں جو رواداری، ایثار اور خدمتِ خلق پر مبنی ہو۔
وزیراعظم کا کہنا تھا کہ حالیہ شدید بارشوں اور سیلابی صورتحال کے پیش نظر باہمی رواداری، امداد و عطیات کے اس سماجی جذبے نے اور بھی اہمیت اختیار کر لی ہے، حالیہ سیلابی صورتحال کے پیش نظر متاثرہ آبادی کے مال و مویشی، روزگار اور گھروں کو شدید نقصان پہنچا ہے۔
انہوں نے کہا ہے کہ متاثرہ آبادی اشیائے خور و نوش، چھت اور صحت کی سہولیات کے منتظر ہیں جس کے لیے وفاقی حکومت، صوبائی حکومتیں، عوام اور فوج سب مل کر ریسکیو اینڈ ریلیف آپریشن کو جاری رکھے ہوئے ہیں۔
شہباز شریف نے کہا کہ عطیات کے عالمی دن پر آج میں پاکستانی عوام اور دنیا بھر میں موجود پاکستانیوں سے سیلاب کے بعد ریلیف اور بحالی کے کاموں میں اپنے ہم وطنوں کی ہر ممکن مدد کرنے کی یاد دہانی کرواتا ہوں، باہمی رواداری اور مدد کے جذبے پر عمل پیرا ہوتے ہوئے ہم بحیثیت قوم ترقی و خوشحالی، باوقار اور مضبوط مستقبل کے لیے پرعزم ہیں۔
