اسلام آباد(پاک ترک نیوز) وزیراعظم شہباز شریف نے کہا ہے کہ پانی ہماری ریڈ لائن ہے ،پاکستان کا پانی روکنے کی کوئی بھی کوشش جنگی اقدام تصور ہو گی، پانی کا بطور ہتھیار استعمال برداشت نہیں کریں گے ،سندھ طاس معاہدے کی یکطرفہ معطلی کا بھارتی فیصلہ ناقابل قبول ہے، ،عالمی سطح پر تسلیم شدہ معاہدوں پر عمل درآمد تمام ملکوں کی ذمہ داری ہے۔
مالدیپ کے صدر ڈاکٹر محمد معیزو کے ہمراہ مشترکہ نیوز کانفرنس کرتے ہوئے وزیراعظم نے کہا کہ عالمی سطح پر تسلیم شدہ معاہدوں پر عمل درآمد تمام ممالک کی ذمہ داری ہے۔ پاکستان تنازعات کے پرامن حل پر یقین رکھتا ہے، مسئلہ کشمیر کو کشمیری عوام کی امنگوں اور اقوام متحدہ کی سلامتی کونسل کی قراردادوں کے مطابق حل کرنا ہوگا۔
شہباز شریف نے کہا کہ پاکستان آزاد اور خودمختار فلسطینی ریاست کے قیام کے لیے اپنے اصولی مؤقف کی حمایت جاری رکھے گا۔
وزیراعظم نے بتایا کہ پاکستان اور مالدیپ نے دوطرفہ تجارت کا حجم آئندہ دو سال میں ایک کروڑ 30 لاکھ ڈالر سے بڑھا کر 20 کروڑ ڈالر تک لے جانے پر اتفاق کیا ہے۔
انہوں نے کہا کہ گیارہ سال بعد مالدیپ کے صدر کا دورۂ پاکستان خصوصی اہمیت رکھتا ہے۔ صدر محمد معیزو کے ساتھ تعمیری اور مثبت بات چیت ہوئی، جس میں اقتصادی تعاون، تجارت اور دفاع سمیت مختلف شعبوں میں اشتراک بڑھانے پر تبادلہ خیال کیا گیا۔
یہ بھی پڑھیں: کینو ریوز جیمز وان کی نئی ہالی وڈ فلم ’’دی گینگسٹر، دی کاپ، دی ڈیول‘‘ میں اداکاری کے لیے تیار
وزیراعظم کے مطابق دونوں ممالک تجارتی حجم میں اضافے کے لیے کوششیں تیز کریں گے، جبکہ پاکستان مالدیپ کو اطلاعاتی ٹیکنالوجی کے شعبے میں تکنیکی معاونت بھی فراہم کرے گا۔
پاکستان اور مالدیپ کے درمیان مختلف شعبوں میں تعاون کے فروغ کے لیے مفاہمتی یادداشتوں پر بھی دستخط کیے گئے۔
