تہران ( پاک ترک نیوز) امریکی صدر ڈونلڈ ٹرمپ اور ایرانی پارلیمنٹ کے اسپیکر محمد باقر قالیباف کے درمیان لفظی محاذ مزید گرم ہوگیا، دونوں رہنماؤں نے ایک دوسرے پر طنزیہ وار کیے۔
امریکی صدر ڈونلڈ ٹرمپ نے سوشل میڈیا پر ایران کی صورتحال پر تبصرہ کرتے ہوئے کہا کہ ایران مکمل تباہی کی جانب بڑھ رہا ہے۔ٹرمپ نے اپنے بیان کے ساتھ محمد باقر قالیباف سے منسوب ایک بیان بھی شیئر کیا، جس میں دعویٰ کیا گیا تھا کہ ایران کو خوراک کی قلت کا سامنا ہے اور فوجی طاقت رکھنے کے باوجود بھوک کی صورت میں جنگ جاری رکھنا ممکن نہیں۔
ایرانی پارلیمنٹ کے اسپیکر محمد باقر قالیباف نے امریکی صدر کے بیان کا جواب دیتے ہوئے ٹرمپ کے معروف انتخابی نعرے ’’میک امریکہ گریٹ اگین‘‘ کو طنزیہ انداز میں تبدیل کردیا۔قالیباف نے سوشل میڈیا پر لکھا: ’’Make America hungry again‘‘ یعنی ’’امریکا کو دوبارہ بھوکا بنا دو‘‘۔ایرانی اسپیکر نے امریکا میں بھوک اور غذائی عدم تحفظ کے اعداد و شمار کا حوالہ دیتے ہوئے دعویٰ کیا کہ 4 کروڑ 70 لاکھ امریکی غذائی عدم تحفظ کا شکار ہیں، جبکہ ہر آٹھ میں سے ایک امریکی شہری کو خوراک کے مسائل کا سامنا ہے۔
محمد باقر قالیباف کے مطابق امریکا میں ایک کروڑ 60 لاکھ بچے بھی غذائی عدم تحفظ سے متاثر ہیں۔ایرانی اسپیکر نے امریکی صدر ڈونلڈ ٹرمپ کو مخاطب کرتے ہوئے کہا کہ جھوٹے دعووں کے ذریعے شکستوں پر پردہ نہیں ڈالا جاسکتا۔
