ترکش ایئر لائنز کا پاکستان کیلئے پروازوں میں اضافے کا فیصلہ

انقرہ ( آئی پاک ٹی وی ) ترکش ایئر لائنز نے پاکستان کیلئے پروازوں میں اضافہ کا فیصلہ کیا ہے۔
ترکش ایئر لائنز 27 اکتوبر 2025 سے پاکستان کے لیے اپنے فلائٹ آپریشنز بڑھانے کیلئے تیار ہے۔
توسیع کے حصے کے طور پر، ایئر لائن اسلام آباد اور لاہور دونوں کے لیے ہفتہ وار پروازوں کی تعداد میں اضافہ کرے گی۔
استنبول سے لاہور کی پروازیں ہفتہ وار 11 سے بڑھ کر 14 ہو جائیں گی جبکہ اسلام آباد کے لیے سروس ہفتہ وار 10 سے بڑھ کر 14 ہو جائے گی۔ ایئر لائن ان راستوں کے لیے ایئربس اے 300 طیارے تعینات کرنے کا ارادہ رکھتی ہے۔
یہ پیش رفت 7 جولائی 2025 کو پیش آنے والے ایک واقعے کے بعد سامنے آئی ہے، جب ترکش ایئرلائن کی ایک پرواز کو تکنیکی خرابی کے باعث لاہور کے علامہ اقبال انٹرنیشنل ایئرپورٹ پر ہنگامی لینڈنگ کرنا پڑی۔ استنبول جانے والا طیارہ ٹیک آف کے فوراً بعد واپس مڑ گیا جب خرابی کا پتہ چلا۔
ایئرپورٹ ذرائع نے بتایا کہ پائلٹ نے فوری طور پر ایئر ٹریفک کنٹرول سے رابطہ کیا اور واپس جانے کی اجازت طلب کی۔ فوری طور پر کلیئرنس دی گئی، اور طیارہ بحفاظت لینڈ کر گیا۔ ہنگامی لینڈنگ کے بعد طیارے کو انجینئرز کے ذریعے تکنیکی معائنہ کے لیے محفوظ پارکنگ بے میں منتقل کر دیا گیا۔