آر اے شمشاد
سہ ملکی سیریز کے چھٹے میچ میں پاکستان اور سری لنکا کی ٹیمیں کل مد مقابل آئیں گی ۔ سری لنکا کو فائنل میں رسائی کیلئے لازمی فتح درکار ہے۔
راولپنڈی میں ٹرائی نیشن سیریز کے اہم میچ میں سری لنکا کا جوڑ پاکستان سے پڑے گا ۔پاکستان پہلے ہی فائنل میں پہنچ چکے ہیں جبکہ سری لنکا جیت کی صورت میں فائنل کا ٹکٹ کٹوالے گا ۔ شکست کھانے پر زمبابوے کی ٹیم شاہینوں کیخلاف 29نومبر کو آخری معرکے میں مد مقابل آئے گی ۔
پاکستان نے تین ملکی سیریز میں اب تک 3میچز کھیلے ہیں اور تمام میچز میں کامیابی حاصل کر کے فائنل کا ٹکٹ کٹوایا ہے ۔ زمبابوے نے 4میں سے صرف ایک کامیابی حاصل کی ہے اور اس کے پوائنٹس ٹیبل پر دوسرا نمبرہے جبکہ سری لنکا کی ٹیم نے 3میچز میں سے صرف ایک میں کامیابی حاصل کی ہے ۔
گزشتہ روز کھیلے گئے سری لنکا اور زمبابوے کے درمیان میچ میں آئی لینڈرز نے 9وکٹوں سے کامیابی حاصل کی ہے ۔ زمبابوے نے پہلے کھیلتے ہوئے مقررہ 20اوورز میں 5وکٹوں کے نقصان پر 146رنز سکور کئے تھے ۔ سری لنکا نے مطلوبہ ہدف 16.2اوورز میں محض ایک وکٹ کے نقصان پر پورا کرلیا تھا۔
قبل ازیں پاکستان نے زمبابوے کو دو میچز میں جبکہ سری لنکا کو ایک میچ میں شکست دی تھی ۔ سہ ملکی سیریز کا یہ آخری گروپ میچ ہے ۔
واضح رہے کہ ٹرائی نیشن سیریز کا فائنل 29اکتوبر کو راولپنڈی میں کھیلا جائے گا اور پاکستان پہلے ہی آخری معرکہ کیلئے کوالیفائی کر چکا ہے ۔ دوسری کونسی ٹیم فائنل میں جگہ بنائے گی اس کا فیصلہ پاک سری لنکا کے کل ہونے میچ پر منحصر ہے۔
