ابھی بھی وقت ہے باز آجائیں، بند گلی کی طرف نہ جائیں ، محسن نقوی کی پی ٹی آئی کو وارننگ

اسلام آباد ( پاک ترک نیوز) وفاقی وزیر داخلہ محسن نقوی نے تحریک انصاف کو اسلام آباد میں دھرنے کی تیاری پر خبردار کرتے ہوئے کہا ہے کہ ابھی بھی وقت ہے، باز آجائیں اور بند گلی کی طرف نہ جائیں۔لاہور میں نیوز کانفرنس کرتے ہوئے محسن نقوی نے کہا کہ تحریک انصاف دھرنے کے لیے اسلام آباد آتی ہے تو قانون کے مطابق نمٹا جائے گا۔وفاقی وزیر داخلہ کا کہنا تھا کہ اسلام آباد ہائیکورٹ کے حکم پر عمل کیا جائے گا، اس بار وفاقی حکومت بھرپور کردار ادا کرے گی اور یہ ہمیشہ کے لیے ہوگا۔انہوں نے کہا کہ اس طرح کے ڈراموں سے کوئی چیز حاصل نہیں ہوگی، اوچھے ہتھکنڈوں کے ذریعے ناجائز مطالبات نہیں مانے جائیں گے۔

محسن نقوی نے واضح کیا کہ حکومت قانون کے مطابق چلے گی، تحریک انصاف کے مطابق نہیں۔وفاقی وزیر داخلہ نے کہا کہ بانی پی ٹی آئی کا علاج بھی قانون کے مطابق ہوگا، ان کی مرضی کے مطابق نہیں۔محسن نقوی کا کہنا تھا کہ تحریک انصاف کی قیادت دھرنوں کی سیاست کرتی ہے، تاہم تحریک انصاف کی اکثریت لانگ مارچ نہیں چاہتی۔