لاہور( پاک ترک نیوز) دنیا کے طاقتور اور کمزور ترین پاسپورٹس کی درجہ بندی پر مبنی ہینلے پاسپورٹ انڈیکس 2026 جاری کر دیا گیا ، جس کے مطابق سنگاپور مسلسل دنیا کا سب سے طاقتور پاسپورٹ رکھنے والا ملک قرار پایا ہے، جبکہ پاکستان 100ویں نمبر پر موجود ہے۔
رپورٹ کے مطابق سنگاپور کے شہری 192 ممالک میں ویزا فری یا ویزا آن ارائیول سہولت کے ساتھ سفر کر سکتے ہیں، جس کے باعث سنگاپور نے ایک بار پھر پہلی پوزیشن برقرار رکھی ہے۔
جاپان، جنوبی کوریا اور متحدہ عرب امارات مشترکہ طور پر دوسرے نمبر پر ہیں، جہاں کے شہری 188 ممالک میں بغیر پیشگی ویزے کے سفر کر سکتے ہیں۔تیسرے نمبر پر سویڈن ہے، جبکہ بیلجیئم، ڈنمارک، فن لینڈ، فرانس، جرمنی، آئرلینڈ، اٹلی، لکسمبرگ، نیدرلینڈز، ناروے اور اسپین مشترکہ طور پر چوتھی پوزیشن پر موجود ہیں۔
پانچویں نمبر پر آسٹریا، یونان، مالٹا، پرتگال اور سوئٹزرلینڈ جبکہ چھٹے نمبر پر ہنگری، پولینڈ اور برطانیہ شامل ہیں۔ساتویں نمبر پر آسٹریلیا، کینیڈا، چیکیا، لٹویا، ملائیشیا، نیوزی لینڈ، سلوواکیہ اور سلووینیا، آٹھویں پر کروشیا اور ایسٹونیا، نویں پر لکٹن اسٹائن اور لتھوانیا جبکہ دسویں نمبر پر آئس لینڈ اور امریکہ موجود ہیں، جن کے شہری 180 ممالک تک ویزا فری رسائی رکھتے ہیں۔
دوسری جانب کمزور ترین پاسپورٹس کی فہرست میں افغانستان 103ویں نمبر پر ہے، جہاں کے شہری صرف 23 ممالک میں ویزا فری سفر کر سکتے ہیں۔
یہ بھی پڑھیں: پاکستان ،قطر کا امریکا ،ایران سے رابطہ ،جنگ روکنے پر زور
شام 102ویں، عراق 101ویں جبکہ پاکستان 100ویں نمبر پر ہے۔ پاکستانی پاسپورٹ رکھنے والے افراد کو صرف 30 ممالک میں ویزا فری یا ویزا آن ارائیول سہولت حاصل ہے۔فہرست میں پاکستان کے بعد یمن، صومالیہ، نیپال، بنگلہ دیش، شمالی کوریا، ایران، فلسطینی علاقے اور اریٹیریا شامل ہیں۔
