پیراماؤنٹ نے 110 ارب ڈالر میں وارنر برادرز ڈسکوری کا کنٹرول سنبھال لیا

ہالی ووڈ (پاک ترک نیوز )ہالی ووڈ کی دو بڑی تفریحی کمپنیوں پیراماؤنٹ اسکائی ڈانس اور وارنر برادرز ڈسکوری کا 110 ارب ڈالر کا تاریخی انضمام مکمل ہوگیا، جس کے بعد عالمی فلم اور ٹیلی ویژن کی صنعت میں بڑی تبدیلی متوقع ہے۔
اس بڑے معاہدے کے نتیجے میں ہالی ووڈ کے کئی معروف ادارے اور تفریحی برانڈز ایک ہی کمپنی کے تحت آگئے ہیں، جن میں ایچ بی او، سی بی ایس، نکلوڈین، شو ٹائم، کامیڈی سینٹرل، ڈی سی اسٹوڈیوز اور فوڈ نیٹ ورک شامل ہیں۔
انضمام کے بعد نئی کمپنی کا نام اسکائی ڈانس کارپوریشن رکھا گیا ہے، جس کی قیادت ڈیوڈ ایلیسن کریں گے۔ ایلیسن کا کہنا ہے کہ دونوں بڑے اداروں کو یکجا کرنا فلمی صنعت کے لیے تاریخی لمحہ ہے اور نئی کمپنی دنیا بھر کے ناظرین کے لیے ہر قسم کی کہانیاں اور تفریح پیش کرنے کی صلاحیت رکھتی ہے۔
اس معاہدے سے پیراماؤنٹ کو وارنر برادرز کی کئی مشہور فلمی اور ٹیلی ویژن سلسلوں کی ملکیت بھی حاصل ہوگئی ہے، جن میں ہیری پوٹر، گیم آف تھرونز اور لارڈ آف دی رنگز شامل ہیں۔ پیراماؤنٹ کے پہلے سے موجود مشہور سلسلوں میں انڈیانا جونز، مشن امپاسیبل اور شریک بھی شامل ہیں۔
امریکی صدر ڈونلڈ ٹرمپ نے بھی انضمام کو خوش آئند قرار دیتے ہوئے کہا ہے کہ نئی کمپنی بہترین ثابت ہوگی۔
نئی کمپنی کے انتظامی ڈھانچے میں بھی اہم تبدیلیاں کی گئی ہیں۔ میٹل کے سبکدوش ہونے والے سربراہ یونون کریز کو شریک سربراہ مقرر کیا گیا ہے، جو روزمرہ کے کاروباری معاملات اور دونوں کمپنیوں کے انضمام کی نگرانی کریں گے، جبکہ ڈیوڈ ایلیسن حکمت عملی اور ٹیکنالوجی پر توجہ دیں گے۔
سی این این کی موجودہ قیادت میں بھی فوری تبدیلی نہیں کی گئی۔ مارک تھامسن سی این این ورلڈ وائیڈ کے چیئرمین اور مدیر اعلیٰ کے طور پر کام جاری رکھیں گے، جبکہ بیری وائس سی بی ایس نیوز کی مدیر اعلیٰ رہیں گی۔