بدلتا ہے رنگ آسماں کیسے کیسے چند ہی روز بعد پاکستان کرکٹ شائقین انگلینڈ کی نیوزی لینڈ کیخلاف بڑی جیت کیلئے دعاگو ہیں ۔
آئی سی سی ٹی ٹونٹی ورلڈ کپ کے سپر ایٹ مرحلے کے اہم میچ میں نیوزی لینڈ اور انگلینڈ کی ٹیمیں مد مقابل آئیں گی تاہم اس بار پاکستانی شائقین انگلینڈ کی بڑی جیت کیلئے دعائیں کرتے نظر آئیں گے کیونکہ یہ میچ پاکستان کیلئے سیمی فائنل میں رسائی کیلئے اہم ہے۔
پاکستانی ٹیم پوائنٹس ٹیبل پر اس وقت تیسری پوزیشن پر موجود ہے اور اس کا سپر ایٹ میں ابھی ایک میچ باقی ہے ۔ پاکستان اور نیوزی لینڈ کے درمیان کھیلا گیا میچ بارش کے باعث منسوخ ہو گیا تھا جس کے باعث دونوں ٹیموں کو ایک ایک پوائنٹ حاصل ہوا تھا ۔ پاکستان کو سیمی فائنل میں رسائی کیلئے کل سری لنکا کیخلاف بڑے مارجن سے جیت ضروری ہے۔
اگر انگلینڈ نیوزی لینڈ کو بڑے مارجن سے شکست سے دوچار کرتا ہے تو پاکستان کی سیمی فائنل میں رسائی آسان ہو سکتی ہے۔ کیوی ٹیم اگر انگلش ٹیم کو شکست سے دوچار کرگئی تو پاکستان کے سیمی فائنل کے امکانات ختم ہو جائیں گے اور قومی ٹیم کو کل کے میچ کے بعد گھر آنا پڑے گا ۔
نیوزی لینڈنے سپر ایٹ میں سری لنکا کو ہرایا تھا اور اس وقت وہ پوائنٹس ٹیبل پر اس کی دوسری پوزیشن موجود ہے۔ اس کے پوائنٹس 3ہیں تو آج کے میچ میں کامیابی سے اس کے پوائنٹس کی تعداد 5ہو جائے گی جس سے وہ سیمی فائنل کیلئے کوالیفائی کر جائے گا ۔ ہار کی صورت میں اس کا بھی دارومدارکل کے پاکستان سری لنکا میچ کے رزلٹ پر انحصار کرنا پڑے گا ۔ واضح رہے کہ انگلینڈ پہلے ہی سیمی فائنل کیلئے کوالیفا کرچکا ہے جبکہ دوسرے گروپ میں بھی سائوتھ افریقہ سیمی فائنل کا ٹکٹ کٹوا چکا ہے جبکہ انڈیا اور ویسٹ انڈیز کا میچ بھی ڈو اینڈ ڈائی کی صورتحال اختیا ر کر گیا ہے۔
