لاہور (پاک ترک نیوز) پاکستان کرکٹ ٹیم کی جنوبی افریقا کے خلاف ہوم ٹیسٹ سیریز کی تیاریوں کیلئے بھرپور انداز میں تیاریاں جاری ہیں۔
قذافی سٹیڈیم لاہور میں کھلاڑیوں نے بھرپور انداز میں ٹریننگ کے بعد سیناریو بیسڈ میچ میں بھی شرکت کی، مقصد میچ فٹنس کا حصول اور مختلف حالات میں کارکردگی کا جائزہ لینا تھا، بیٹرز اور بولرز کو الگ الگ اہداف دیکر کارکردگی پر کڑی نظر رکھی گئی۔
عبوری ریڈ بال ہیڈ کوچ اظہر محمود نے کھلاڑیوں کو بیٹنگ اور بولنگ کے حوالے سے ہدایات دیں، قومی کھلاڑیوں نے نہ صرف بیٹنگ اور بولنگ پر محنت کی بلکہ فیلڈنگ سیشن میں بھی خصوصی توجہ دی گئی، ٹیم مینجمنٹ کے مطابق کیمپ کا مقصد کھلاڑیوں کو جنوبی افریقہ سے سیریز کے لیے تیار کرنا ہے تاکہ وہ دبائو کے ماحول میں بہتر کھیل پیش کر سکیں۔
میچ کے حوالے سے کوچنگ سٹاف نے کہا کہ ایسے مقابلے ذہنی طور پر تیار کرنے میں مددگار ثابت ہوتے ہیں، پریکٹس میچز کا سلسلہ مزید جاری رکھا جائے گا۔ پاکستانی ٹیسٹ سکواڈ کا کیمپ 8 اکتوبر تک قذافی اسٹیڈیم میں جاری رہے گا، کھلاڑی روزانہ کی بنیاد پر ٹریننگ، فٹنس ڈرلز اور پریکٹس میچز میں حصہ لیں گے۔
یاد رہے کہ پاکستان اور جنوبی افریقہ کے درمیان ٹیسٹ سیریز کا پہلا میچ 12 اکتوبر سے قذافی اسٹیڈیم لاہور میں کھیلا جائے گا، دوسرا ٹیسٹ 20 سے 24 اکتوبر تک راولپنڈی اسٹیڈیم میں شیڈول ہے۔
پاکستان کرکٹ ٹیم کی جنوبی افریقا کیخلاف ٹیسٹ سیریز کیلئے تیاریاں جاری
