موسمِ سرما کی تعطیلات میں توسیع نہیں ہوگی: وزیر تعلیم پنجاب

لاہور:(پاک ترک نیوز)پنجاب میں موسمِ سرما کی تعطیلات میں کسی قسم کی توسیع نہیں کی جا رہی اور صوبے بھر کے تمام اسکول اور کالجز 12 جنوری سے معمول کے مطابق کھل جائیں گے۔
سوشل میڈیا پر سردی کی شدت کے باعث تعطیلات میں اضافے کی گردش کرنے والی خبروں کو حکومتِ پنجاب نے مسترد کر دیا ہے۔ اس حوالے سے پنجاب کے وزیر تعلیم رانا سکندر حیات نے سماجی رابطے کی ویب سائٹ ایکس پر وضاحتی بیان جاری کرتے ہوئے کہا کہ صوبے میں تمام سرکاری و نجی تعلیمی ادارے طے شدہ شیڈول کے مطابق 12 جنوری کو دوبارہ کھلیں گے۔
انہوں نے واضح کیا کہ موسمِ سرما کی تعطیلات میں توسیع کی کوئی تجویز زیر غور نہیں ہے۔رانا سکندر حیات نے سوشل میڈیا پر پھیلنے والی خبروں کو “بے بنیاد اور گمراہ کن” قرار دیتے ہوئے عوام سے اپیل کی کہ غیر مصدقہ اطلاعات آگے نہ پھیلائیں۔
ان کا کہنا تھا کہ تعلیمی کیلنڈر میں کسی قسم کی تبدیلی نہیں کی گئی اور تمام تعلیمی ادارے وقت پر کلاسز کی بحالی کے لیے تیاری کریں۔
وزیر تعلیم کی جانب سے یہ وضاحت ایسے وقت میں سامنے آئی ہے جب پنجاب کے مختلف علاقوں میں سرد اور خشک موسم برقرار ہے۔
محکمہ موسمیات کے مطابق آئندہ دنوں میں بیشتر اضلاع میں سردی کی شدت برقرار رہنے کا امکان ہے، جبکہ مری، گلیات اور قریبی پہاڑی علاقوں میں مطلع ابر آلود رہ سکتا ہے اور شام یا رات کے اوقات میں ہلکی بارش یا برفباری بھی متوقع ہے۔
دوسری جانب، حکومت پنجاب کی جانب سے تعطیلات میں توسیع کی تردید کے بعد سندھ میں نجی تعلیمی اداروں سے متعلق بعض نئی پیش رفت سامنے آنے کی اطلاعات بھی موصول ہو رہی ہیں۔ تاہم پنجاب میں تعلیمی سرگرمیاں مقررہ تاریخ کے مطابق بحال ہوں گی۔