قابض اسرائیلی فوج کے مغربی کنارے میں گھروں پر حملے ،متعدد فلسطینی گرفتار

مقبوضہ بیت المقدس ( پاک ترک نیوز) قابض اسرائیلی فوج نے جمعرات کی صبح مغربی کنارے کے مختلف علاقوں میں گھروں پر حملوں کے دوران متعدد شہریوں کو گرفتار کرلیا ہے۔ جبکہ کئی مقامات پر جھڑپیں بھی ہوئیں۔
مرکزاطلاعات فلسطین کی رپورٹ کے مطابق قابض اسرائیلی فوج نے مغربی کنارے کے شہروں جنین، نابلس اور الخلیل پر دھاوا بولا اور شہریوں کے گھروں میں گھس کر اندھا دھند گرفتاریاں کیں۔
ذرائع نے بتایا ہے کہ صہیونی فوج نے رام اللہ کے شمال مشرق میں واقع بلہ سلواد، الخلیل کے شمال مشرق میں سعیر، بیت لحم کے مشرق میں بیت تعمر گاؤں اور نابلس کے جنوب میں بلہ بیتا پر بھی یلغار کی۔
فلسطینی حکومت کے اعداد و شمار کے مطابق غزہ میں جاری نسل کشی کے ساتھ ساتھ مغربی کنارے اور مقبوضہ بیت المقدس میں قابض اسرائیلی فوج اور مسلح صہیونی غنڈے اب تک کم از کم 1017 فلسطینیوں کو شہید کر چکے ہیں اور تقریباً 7 ہزار افراد کو زخمی کیا گیا ہے۔ اس کے علاوہ 18 ہزار 500 سے زیادہ شہریوں کو گرفتار بھی کیا گیا ہے۔
امریکی پشت پناہی کے ساتھ قابض اسرائیل کے 7 اکتوبر2023ء سے غزہ میں اجتماعی نسل کشی کے جاری مذموم عمل میں اب تک 63 ہزار 746 فلسطینی شہید ہو چکے ہیں، 1 لاکھ 61 ہزار 245 زخمی ہوئے ہیں جن میں اکثریت خواتین اور بچوں کی ہے۔ جبکہ اس دوران 10 ہزار سے زائد افراد لاپتہ ہیں ۔