جدہ(پاک ترک نیوز ) نائب وزیراعظم اور وزیر خارجہ اسحاق ڈار دورہ بنگلہ دیش کے بعد سعودی عرب پہنچ گئے۔
ترجمان دفتر خارجہ کا کہناہے کہ اسحاق ڈار او آئی سی وزرائے خارجہ کی کونسل کے 21 ویں اجلاس میں شریک ہوں گے، اجلاس او آئی سی کے رکن ممالک کے وزرائے خارجہ اور اعلیٰ حکام کو اکٹھا کرے گا۔
دفتر خارجہ کا کہنا ہے کہ اجلاس میں فلسطین میں اسرائیل کی جاری فوجی جارحیت پر بات ہوگی۔غزہ پر مکمل فوجی کنٹرول کے مجوزہ منصوبوں اور فلسطینیوں کے حقوق کی مسلسل سنگین خلاف ورزیوں پر غور کیا جائے گا۔
واضح رہے کہ قبل ازیں نائب وزیراعظم اور وزیر خارجہ اسحاق ڈار نے 23 اور 24 اگست تک بنگلہ دیش کا دورہ کیا، یہ سرکاری دورہ بنگلہ دیش کی حکومت کی دعوت پر کیا گیا، کسی بھی پاکستانی وزیر خارجہ کا تقریباً 13 سال بعد بنگلہ دیش کا پہلا دورہ تھا، اسحاق ڈار نے بنگلہ دیش کے مشیر برائے امور خارجہ محمد توحید حسین سے ملاقات کی۔
دفتر خارجہ کے ترجمان نے بتایا کہ اسحاق ڈار نے چیف ایڈوائزر بنگلہ دیش محمد یونس سے ملاقات کی، اسحاق ڈار نے مشیر تجارت شیخ بشیر الدین کے ساتھ بھی ملاقات کی، اقتصادی اور تجارت سے متعلق سینئر حکام کی موجودگی میں اسحاق ڈار کی مشیر تجارت بنگلہ دیش سے ملاقات ہوئی۔اسحاق ڈار نے بنگلہ دیش کی نیشنلسٹ پارٹی، جماعت اسلامی اور نیشنل سٹیزن پارٹی کے وفود سے بھی ملاقاتیں کیں، دورے میں متعدد معاہدوں، مفاہمت ناموں پر دستخط کئے گئے، سفارتی اور سرکاری پاسپورٹ ہولڈرز کے لئے ویزا کے خاتمے کے معاہدہ پر دستخط ہوئے۔
ترجمان کے مطابق تجارت پر مشترکہ ورکنگ گروپ کے قیام پر مفاہمتی یادداشت پر دستخط ہوئے، انسٹی ٹیوٹ آف سٹریٹجک سٹڈیز اسلام آباد اور بنگلہ دیش انسٹی ٹیوٹ آف انٹرنیشنل اینڈ سٹریٹجک سٹڈیز کے درمیان مفاہمتی یادداشت پر دستخط ہوئے۔پاکستان کی فارن سروس اکیڈمی اور بنگلہ دیش کی فارن سروس اکیڈمی کے درمیان مفاہمتی یادداشت دستخط ہوئے، اے پی پی اور بنگلہ دیش سنگباد سنگستھا کے درمیان مفاہمتی یادداشت دستخط ہوئے، ثقافتی تبادلہ پروگرام پر بھی دستخط کئے گئے۔
غزہ پر او آئی سی وزرائے خارجہ اجلاس کیلئے اسحاق ڈار سعودی عرب پہنچ گئے
