اسلام آباد ( پاک ترک نیوز) الیکشن کمیشن نے اسلام آباد میں بلدیاتی انتخابات 2015 کے بلدیاتی قانون کے تحت کرانے کا حکم دے دیا۔ کمیشن نے انتخابی شیڈول بھی آج ہی جاری کرنے کی ہدایت کردی۔چیف الیکشن کمشنر سکندر سلطان راجہ کی سربراہی میں پانچ رکنی کمیشن نے کیس کی سماعت کی، جس میں سیکریٹری داخلہ اور الیکشن کمیشن کے حکام پیش ہوئے۔سماعت کے دوران اسپیشل سیکریٹری الیکشن کمیشن ظفر اقبال ملک نے بتایا کہ اسلام آباد میں اب تک چھ مرتبہ حلقہ بندیاں کی جا چکی ہیں، جبکہ چار مرتبہ انتخابی شیڈول بھی جاری کیا گیا۔ ان کے مطابق آخری انتخابی پروگرام 9 اکتوبر 2026 کو جاری کیا گیا تھا، تاہم انتخابی عمل آگے نہ بڑھ سکا۔
الیکشن کمیشن کو بتایا گیا کہ حکومت کی جانب سے جاری صدارتی حکم کی مدت 6 ستمبر کو ختم ہوگئی تھی، جبکہ 14 اکتوبر کو حتمی حلقہ بندیاں شائع کردی گئی تھیں۔ وزارت داخلہ کو صدارتی حکم کی مدت ختم ہونے سے متعلق دو مرتبہ یاددہانی کے خطوط بھی بھجوائے گئے۔اسپیشل سیکریٹری الیکشن کمیشن کے مطابق اسلام آباد بلدیاتی حکومت کے قواعد تاحال فراہم نہیں کیے گئے، جبکہ وزارت قانون نے قواعد کی منظوری دینے سے بھی انکار کردیا۔ وفاقی حکومت نے نیا بلدیاتی قانون بھی نہیں بنایا، اس لیے موجودہ 2015 کے قانون کے تحت انتخابات کرانے کی اجازت دینے کی استدعا کی گئی۔سیکریٹری داخلہ نے الیکشن کمیشن میں پیش کیے گئے حقائق کو درست تسلیم کیا، تاہم مؤقف اختیار کیا کہ 2015 کے قانون کے تحت انتخابات کرانے کی صورت میں اب تک کی کارروائی ختم کرنا پڑے گی۔چیف الیکشن کمشنر سکندر سلطان راجہ نے ریمارکس دیے کہ اگر 2015 کے قانون کے تحت انتخابات کرائے جائیں تو حلقہ بندیوں پر کوئی اثر نہیں پڑے گا۔ انہوں نے کہا کہ وزیر داخلہ، سیکریٹری داخلہ، چیف کمشنر اور وزرا کی کمیٹی کی جانب سے متعدد یقین دہانیاں کرائی گئی تھیں۔
یہ بھی پڑھیں: پاکستان اور مالدیپ کا تجارت، سرمایہ کاری، تعلیم اور سیاحت میں تعاون بڑھانے پر اتفاق
چیف الیکشن کمشنر نے ریمارکس دیے کہ ایسا محسوس ہوتا ہے کہ حکومت اسلام آباد میں بلدیاتی انتخابات کرانا ہی نہیں چاہتی۔ آئین کے مطابق بلدیاتی انتخابات قانون کے تحت کرانا لازم ہے اور الیکشن کمیشن مجبور ہوکر انتخابات کے انعقاد کا حکم دے رہا ہے۔الیکشن کمیشن نے اپنے مختصر حکمنامے میں اسلام آباد میں 2015 کے بلدیاتی قانون کے تحت انتخابات کرانے اور انتخابی شیڈول آج ہی جاری کرنے کی ہدایت کردی۔
