استنبول (پاک ترک نیوز)
ترکیہ کے صدر رجب طیب اردوان نے خبردار کیا ہے کہ "روٹی کے ایک ٹکڑے یا ایک گھونٹ پانی” کی خواہش میں فلسطینیوں کا مرنا ناقابلِ قبول ہے
استنبول میںتقریب سے خطاب کے دوران دیا گیا یہ انتباہ غزہ جنگ پر بڑھتی ہوئی بین الاقوامی تنقید اور اسرائیل کی مذمت کےتناظر میں سامنے آیا ہے۔اردوان نے کہا کہ کوئی کم ترین انسانی وقار کا حامل شخص بھی اس ظلم کو قبول نہیں کر سکتا کہ روزانہ درجنوں بے گناہ لوگ اس لیے مرتے ہوں کیونکہ انہیں روٹی کا ایک ٹکڑا یا پانی کا ایک گھونٹ نہیں ملتا۔
صدراردوان اسرائیل پر اکثر تنقید کرتے ہیں لیکن ان کا یہ اعلان اس وقت سامنے آیا ہے جب اسرائیل کو اقوامِ متحدہ کے اداروں اور بین الاقوامی دارالحکومتوں کی جانب سے شہریوں کی جانوں کے تحفظ اور غزہ میں امداد کی اجازت دینے کے متعدد مطالبات کا سامنا ہے۔
یورپی یونین کی سربراہ برائے خارجہ پالیسی کاجا کالاس نے کہا ہے کہ اسرائیلی افواج کو خوراک کی تقسیم کے مقامات پر "لوگوں کا قتل بند کرنا چاہیے”۔ جبکہ اقوامِ متحدہ کے انسانی حقوق کے سربراہ وولکر ترک نے اسرائیل کو خبردار کیا کہ وہ بین الاقوامی قوانین کی خلاف ورزی کر رہا ہے۔
غزہ کی سول ڈیفنس ایجنسی نے کہا ہے کہ آج کے دن فلسطینی علاقے میں اسرائیلی حملوں میں 21 افراد جاں بحق ہو گئے جبکہ عالمی ادارۂ صحت نے کہا کہ اسرائیلی فوجیوں نے اس کے عملے کی رہائش گاہ پر حملہ کیاہے۔
روٹی کے ایک ٹکڑے کے لیے غزہ کے باشندوں کامرنا قابل قبول نہیں۔ ترک صدر
