واشنگٹن : (پاک ترک نیوز)امریکا کی ریاست واشنگٹن میں واقع بوئنگ ایورٹ فیکٹری کو دنیا کی سب سے بڑی فیکٹری قرار دیا جاتا ہے، جہاں ایک ہی چھت تلے بیک وقت آٹھ بڑے مسافر بردار طیارے تیار کرنے کی صلاحیت موجود ہے۔
یہ دیوہیکل صنعتی مرکز تقریباً 100 ایکڑ پر پھیلا ہوا ہے اور یہاں 30 ہزار سے زائد انجینئرز، مکینکس اور تکنیکی ماہرین کام کرتے ہیں۔فیکٹری کے اندر داخل ہوتے ہی اس کے حجم کا اندازہ لگانا مشکل ہو جاتا ہے۔ طیاروں کے بڑے بڑے حصے، جن میں فیوزلاج، پروں اور کاک پٹ کے سیکشن شامل ہیں، مختلف مراحل سے گزرتے ہیں۔
کرینوں کے ذریعے پروں کو جوڑا جاتا ہے جبکہ انجن اور دم کے حصے مخصوص زونز میں نصب کیے جاتے ہیں۔ طیاروں کی تیاری کا پورا عمل سخت نظم و ضبط اور طے شدہ شیڈول کے تحت انجام پاتا ہے۔
بوئنگ ایورٹ کو مختلف پیداواری زونز میں تقسیم کیا گیا ہے، جہاں ہر ٹیم ایک خاص مرحلے کی ذمہ دار ہوتی ہے۔ پرزے ریل، ٹرک اور خصوصی طیاروں کے ذریعے فیکٹری تک پہنچائے جاتے ہیں، تاکہ پیداواری عمل میں کسی قسم کی تاخیر نہ ہو۔
عمارت اتنی وسیع ہے کہ بعض اوقات اس کے مختلف حصوں میں درجہ حرارت کا فرق بھی محسوس کیا جاتا ہے۔
یہاں تیار ہونے والے طیارے دنیا بھر کی ایئرلائنز کے حوالے کیے جاتے ہیں اور بعض دنوں میں ایک سے زائد مکمل جہاز فیکٹری سے روانہ ہو جاتے ہیں۔
ماہرین کے مطابق بوئنگ ایورٹ جدید انجینئرنگ، اجتماعی محنت اور صنعتی منصوبہ بندی کی ایک نمایاں مثال ہے، جو عالمی فضائی صنعت میں اہم کردار ادا کر رہی ہے۔
