اسلام آباد (پاک ترک نیوز )صدر مملکت آصف علی زرداری پانچ روزہ دورہ پر چین چلے گئے ،لاہور ائیر پورٹ پر گورنرپنجاب سردار سلیم حیدر خان نے صدر پاکستان کو الوداع کیا۔گورنر سردار سلیم حیدر خان نے صدر مملکت سے نیک تمناؤں کا اظہار کیا۔
چینی حکومت کی دعوت پر صدر مملکت آصف علی زرداری پانچ مئی تک چین میں قیام کریں گے۔ یہ اہم دورہ دونوں ممالک کے درمیان دیرینہ اعلیٰ سطحی تبادلوں کا تسلسل ہے۔
ملاقاتوں میں پاک چین دوطرفہ تعلقات پر تفصیلی بات چیت ہوگی جس میں اقتصادی اور تجارتی تعاون کے ساتھ ساتھ چین پاکستان اقتصادی راہداری یعنی سی پیک کے منصوبوں پر خاص طور پر توجہ مرکوز کی جائے گی۔
یہ دورہ دونوں ممالک کے درمیان سفارتی تعلقات کے قیام کی 75 ویں سالگرہ کے تناظر میں انتہائی اہمیت کا حامل ہے۔ یہ دورہ دونوں ممالک کے درمیان ہمہ جہت تزویراتی تعاون کی شراکت داری کو مضبوط بنانے کا عزم ہے۔
یہ بھی پڑھیں: وزیراعظم شہبازشریف سے چینی سفیر کی ملاقات
صدر مملکت 25 تا 27 اپریل ہونان صوبے کے شہر چانگشا اور 28 سے یکم مئی تک ہینان صوبے کے شہر سانیا میں قیام کریں گے۔ اس دوران وہ وہاں کی صوبائی قیادت کے ساتھ اہم ملاقاتیں کریں گے۔
