کولمبیا میں مسافر طیارہ پہاڑ سے ٹکرا کر تباہ، سیاست دان سمیت تمام مسافر ہلاک

بوگوٹا:(پاک ترک نیوز)کولمبیا کے شمالی حصے میں ایک مسافر بردار طیارہ حادثے کا شکار ہو گیا، جس کے نتیجے میں طیارے میں موجود تمام افراد جانبر نہ ہو سکے۔
حکام کے مطابق حادثے میں 15 افراد ہلاک ہوئے، جن میں مسافر اور عملے کے ارکان شامل تھے۔ملکی ایئرلائن ساتینا نے تصدیق کی ہے کہ حادثے کا شکار ہونے والا طیارہ بیچ کرافٹ 1900 تھا۔
ایئرلائن کے مطابق طیارہ ایک پہاڑی علاقے میں گرا، جہاں بعد ازاں اس کا ملبہ تلاش کر لیا گیا، تاہم حادثے کی وجہ تاحال سامنے نہیں آ سکی۔
ایئرلائن حکام کے مطابق پرواز مقامی وقت کے مطابق دوپہر کے وقت اوکانا شہر میں لینڈ کرنے والی تھی، جو وینزویلا کی سرحد کے قریب واقع ہے۔
لینڈنگ سے کچھ ہی دیر قبل طیارے کا ایئر ٹریفک کنٹرول سے رابطہ اچانک منقطع ہو گیا۔حادثے کا شکار پرواز نے کوکوتا شہر سے اڑان بھری تھی اور اس میں 13 مسافر جبکہ دو عملے کے افراد سوار تھے۔
مسافروں کی فہرست کے مطابق جاں بحق ہونے والوں میں کولمبیا کے موجودہ رکنِ پارلیمنٹ دیوجینس کوئنٹیرو امایا اور آئندہ کانگریسی انتخابات میں حصہ لینے والے امیدوار کارلوس سالسیڈو بھی شامل ہیں۔
حادثے کے فوراً بعد دشوار گزار پہاڑی علاقے میں ریسکیو اور سرچ آپریشن شروع کر دیا گیا، جبکہ متاثرہ خاندانوں کے لیے ایک خصوصی ہاٹ لائن بھی قائم کی گئی ہے تاکہ انہیں بروقت معلومات فراہم کی جا سکیں۔صوبہ نورتے دے سانتاندیر کے گورنر کے مطابق ابتدائی طور پر متعدد لاشیں نکالی جا چکی ہیں، جبکہ باقی افراد کی تلاش جاری ہے۔
کولمبیا کی مسلح افواج بھی سرچ آپریشن میں شامل ہیں، کیونکہ حادثے کا مقام سیکیورٹی کے لحاظ سے حساس تصور کیا جاتا ہے۔صدر گوستاوو پیٹرو نے حادثے پر گہرے دکھ اور افسوس کا اظہار کرتے ہوئے جاں بحق افراد کے اہل خانہ سے تعزیت کی ہے۔ دیوجینس کوئنٹیرو امایا کی وفات کی تصدیق ان کے سوشل میڈیا اکاؤنٹس پر بھی کی گئی، جہاں انہیں عوامی خدمت اور تنازعات سے متاثرہ افراد کی آواز کے طور پر یاد کیا گیا۔
حکام کے مطابق حادثے کی مکمل تحقیقات شروع کر دی گئی ہیں، تاکہ طیارے کے رابطہ منقطع ہونے اور حادثے کی اصل وجوہات کا تعین کیا جا سکے۔