اسلام آباد(پاک ترک نیوز ) پاکستان اور روس کے درمیان آج 10 ویں بین الحکومتی کمیشن اجلاس کے اختتام پر اہم مفاہمتی یادداشتوں اور پروٹوکولز پر دستخط ہوں گے۔
تفصیلات کےمطابق وفاقی وزیر برائے پاور ڈویژن سردار اویس لغاری اور روسی وزیر توانائی بین الحکومتی کمیشن اجلاس کی مشترکہ صدارت کریں گے، روسی وزیر توانائی گزشتہ روز اسلام آباد پہنچ چکے ہیں۔
روسی وزیر توانائی نے گزشتہ رات پی این سی اے میں منعقد خصوصی کنسرٹ میں بھی شرکت کی، روسی وزیر توانائی سرگئی تسویلیف نے فنکاروں اور گلوکاروں کی پرفارمنس کو سراہا، کنسرٹ میں اسٹیٹ اکیڈمک رشین فوک انسمبل کی جانب سے فن کا مظاہرہ کیا گیا۔
اس تقریب میں روسی نائب وزیر سائنس و اعلیٰ تعلیم، نائب وزیر توانائی اور وزارت ثقافت سمیت وفد کے دیگر اعلیٰ حکام نے شرکت کی۔
کنسرٹ میں روس سے آئے فنکاروں نے روسی ثقافت کا شاندار مظاہرہ کیا جس کو شرکاء نے خوب سراہا، کنسرٹ میں ڈارک آئیز، پیڈلرز اور دیگر کلاسیکی روسی و سوویت دھنیں پیش کی گئیں۔
اس شاندار تقریب میں روسی فوک کلچر کے ساتھ ساتھ پاکستانی موسیقی کی دُھنیں بھی شائقین کی توجہ کا مرکز رہیں، تقریب میں موجود پاکستانی اور روسی شرکاء دونوں ممالک کے فوک کلچر سے خوب لطف اندوز ہوئے۔
پاکستان اور روس کے درمیان آج کئی اہم مفاہمتی یادداشتوں پر دستخط ہوں گے
