راولپنڈی (پاک ترک نیوز )راولپنڈی میں جنرل ہیڈ کوارٹرز، جی ایچ کیو میں ترک مسلح افواج کے یومِ فتح کی 104ویں سالگرہ کے موقع پر پروقار تقریب کا انعقاد کیا گیا۔
تقریب کے مہمانِ خصوصی ترک سفیر عرفان نذیراوغلو تھے، جبکہ پاک فوج کے افسران، ترک سفارتخانے کے حکام اور دیگر معزز شخصیات نے شرکت کی۔
تقریب میں پاکستان اور ترکیہ کے درمیان دیرینہ برادرانہ تعلقات، باہمی احترام اور مشترکہ اقدار پر مبنی مضبوط روابط کو خراجِ تحسین پیش کیا گیا۔
ترک مسلح افواج کی بہادری، قربانیوں اور شاندار خدمات کو بھی خراجِ عقیدت پیش کیا گیا۔
اس موقع پر پاکستان اور ترکیہ کے درمیان دفاعی اور اسٹریٹجک شراکت داری مزید مضبوط بنانے کے عزم کا اعادہ کیا گیا۔
تقریب کے اختتام پر ترکیہ کے عوام اور مسلح افواج کے لیے نیک خواہشات کا اظہار بھی کیا گیا۔
