اسلام آباد(پاک ترک نیوز ) مسلم لیگ ن اور پیپلز پارٹی کی قانونی ٹیموں کی اہم بیٹھک آج ایوان صدر میں ہوگی، ذرائع کے مطابق ملاقات میں جوڈیشل کمیشن کی سفارشات کی روشنی میں 24 ججز کی تقرری کا معاملہ زیر بحث آئے گا۔
ذرائع کا کہنا ہے کہ حکومت صدر مملکت سے وزیراعظم کی جانب سے بھیجی گئی سمری پر دستخط کرنے کی درخواست کرے گی۔
حکومتی ذرائع کے مطابق آئین کے آرٹیکل 48 کے تحت صدر مملکت وزیراعظم کی ایڈوائس پر عمل کرنے کے پابند ہیں، جبکہ ایوان صدر کے ذرائع کا مؤقف ہے کہ صدر مملکت صرف پوسٹ آفس نہیں، انہیں سمری روکنے کا صوابدیدی اختیار بھی حاصل ہے۔
ذرائع کے مطابق ن لیگ اور پیپلز پارٹی کے آئینی و قانونی ماہرین موجودہ صورتحال کا قابل قبول حل نکالنے کے لیے مشاورت کریں گے۔
صدر مملکت نے تاحال سمری پر دستخط نہیں کیے اور نہ ہی سمری پر کوئی اعتراض اٹھایا ہے، ذرائع کا کہنا ہے۔
حکومت آج کے اجلاس میں آئین کے آرٹیکل 48 کے تناظر میں مختلف عدالتی فیصلوں کا حوالہ بھی دے گی۔
ذرائع کے مطابق مذاکرات ناکام ہونے کی صورت میں حکومت خود ججز کی تقرری کا نوٹیفکیشن جاری کرنے کے آپشن پر بھی غور کر رہی ہے۔
