تہران ( پاک ترک نیوز) ایران پر امریکی فوج کے ممکنہ زمینی حملے سے متعلق قیاس آرائیوں پر ایرانی پاسدارانِ انقلاب کا ردعمل سامنے آ گیا۔ پاسدارانِ انقلاب کے اعلیٰ کمانڈر کے مشیر بریگیڈیئر جنرل محمد رضا نقدی نے دعویٰ کیا ہے کہ امریکا ایران پر زمینی حملے کی جرأت نہیں کرے گا، کیونکہ ایسا کوئی بھی اقدام امریکی فوج کے لیے تباہ کن ثابت ہو سکتا ہے۔ایرانی ذرائع ابلاغ سے گفتگو کرتے ہوئے محمد رضا نقدی نے کہا کہ امریکیوں کی انتہائی خفیہ ملاقاتوں میں بھی ایران پر زمینی حملے کے حوالے سے کوئی بات نہیں ہوئی۔ ان کے مطابق امریکا صرف ذرائع ابلاغ کے ذریعے اس معاملے کو اچھال رہا ہے، کیونکہ اسے زمینی حملے کے ممکنہ نتائج کا بخوبی اندازہ ہے۔
یہ بھی پڑھیں: چینی کمپنی کا پاکستان میں ایک کروڑ ڈالر کی سرمایہ کاری کا منصوبہ،الیکٹرک گاڑیاں بنانے میں دلچسپی
محمد رضا نقدی نے دعویٰ کیا کہ اگر امریکی فوج نے ایران میں زمینی کارروائی کی تو بڑی تعداد میں امریکی فوجیوں کو گرفتار کیا جا سکتا ہے، جس کے بعد امریکا کو ہتھیار ڈالنے پر مجبور ہونا پڑے گا۔ایرانی کمانڈر کے مشیر نے عراق اور افغانستان میں امریکی فوجی کارروائیوں کا حوالہ دیتے ہوئے کہا کہ ان جنگوں پر امریکا کے تقریباً سات کھرب ڈالر خرچ ہوئے، لیکن بھاری اخراجات کے باوجود امریکا اپنے مقاصد حاصل کرنے میں ناکام رہا۔
