اسلام آباد( پاک ترک نیوز) صدر مملکت آصف علی زرداری نے مزدوروں کے عالمی دن کے موقع پر پیغام میں کہا کہ محنت کش طبقے کے حالات کو بہتر بنانے کے لیے مناسب اجرت، کام کے لیے محفوظ ماحول، صحت کی سہولیات اور ان کے بچوں کو تعلیمی سہولیات فراہم کرنے بارے اقدامات کی ضرورت ہے۔
صدر مملکت نے کہا کہ آج کا عالمی دن ملکی سماجی اور اقتصادی ترقی کے لیے انتھک کوشش کرنے والے محنت کشوں کو خراج تحسین پیش کرنے کے لیے منایا جا رہا ہے۔ یہ دن مزدوروں کے حقوق، ان کے سماجی تحفظ، منصفانہ اجرت اور کام کےلئے محفوظ ماحول بارے کوششیں کرنے کی یاد دلاتا ہے۔
صدر مملکت نے کہا پاکستان میں مزدور اور محنت کش طبقے کو مہنگائی، ضروریات زندگی کی بڑھتی قیمتوں، بے روزگاری اور موسمیاتی تبدیلی کے منفی اثرات جیسے چیلنجز کا سامنا ہے، محنت کش طبقے کے حالات کو بہتر بنانے کےلئے مناسب اجرت، کام کے لیے محفوظ ماحول، صحت کی سہولیات اور مزدوروں کے بچوں کو تعلیمی سہولیات فراہم کرنے کے لیے اقدامات کی ضرورت ہے۔
یہ بھی پڑھیں: آیئے عہد کریں ،مزدوروں کے حقوق کا تحفظ کرینگے ،وزیراعظم
انہوں نے کہا کہ مزدوروں کے استحصال کے خاتمے،سماجی تحفظ کے پروگرام شروع کرنے، حقوق کے تحفظ کےلئے پالیسیوں کے نفاذ اور عمل درآمد میں ریاست کا اہم کردار ہے۔
آج ہم دل کی گہرائیوں سے ملک کی ترقی میں قابل ستائش کردار ادا کرنے والے محنت کشوں کی خدمات کا اعتراف کرتے ہیں، خطرناک ماحول میں کام کرنے والے مزدوروں کو ضروری تربیت اور حفاظتی سامان کی فراہمی یقینی بنانا ہوگی، امید ہے کہ وفاقی اور صوبائی حکومتیں مزدوروں کے حقوق کے تحفظ کے لیے اپنا کردار ادا کریں گی، استحصالی طریقوں کے خاتمے اور مزدوروں کے لیے سماجی تحفظ کے پروگرام شروع کرنا ہوں گے ۔ پاکستان میں محنت کش اور مزدور طبقے کے لیے ایسا سازگار ماحول پیدا کریں جہاں ان کی قدر اور عزت کی جائے، آجر منصفانہ اجرت، مزدوروں کی سلامتی اور صحت کے لیے اقدامات کریں۔
