اسلام آباد (پاک ترک نیوز )وزیراعظم شہبازشریف اور امیرِ قطر کے درمیان ٹیلیفونک رابطہ ہوا ہے ۔دونوں رہنماؤں کے درمیان نہایت خوشگوار اور دوستانہ گفتگو ہوئی۔
وزیراعظم ہاؤس کے اعلامیے کے مطابق امیرِ قطر نے وزیراعظم کو پاکستان کی کامیاب سفارتی کوششوں پر مبارکباد دی اور کہاپاکستان کی کاوشوں کے نتیجے میں امریکہ اور ایران کے درمیان تاریخی اسلام آباد مفاہمتی یادداشت پر دستخط ہوئے۔ امیر قطر نے وزیراعظم کی قیادت کو سراہا
امیر قطر نے پاکستان کی امن کی کوششوں کے لیے قطر کی مکمل حمایت کا اظہار کیا۔وزیراعظم نے امیرِ قطر کا امن کی کوششوں میں مسلسل اور بھرپور تعاون پر شکریہ ادا کیا۔
وزیراعظم شہبازشریف نے کہا یہ کامیابی فیلڈ مارشل سید عاصم منیر کی انتھک کوششوں اور قطر سمیت برادر ممالک کے اہم کردار کی بدولت ممکن ہوئی۔
دونوں رہنماؤں نے سوئٹزرلینڈ کے علاقے برگن اسٹاک میں ہونے والے تکنیکی سطح کے مذاکرات کے پہلے دور پر اطمینان کا اظہار کیا اور کہا مثبت پیش رفت کا سلسلہ جاری رہنا چاہیے تاکہ مذاکرات کامیاب ہو سکیں۔
مذاکراتی عمل کو نقصان پہنچانے کی کوششوں سے محفوظ رکھنا ضروری ہے۔ دونوں رہنماؤں کا اتفاق
امیرِ قطر نے راس لفان انڈسٹریل سٹی کی برزان گیس تنصیب میں آتشزدگی کے افسوسناک واقعے میں ایک پاکستانی شہری کے جاں بحق ہونے پر گہرے دکھ اور افسوس کا اظہار بھی کیا۔وزیراعظم نے امیر قطر کی ہمدردی پر شکریہ ادا کیا
وزیراعظم نے کہا قطر کی قیادت قطر میں مقیم پاکستانی برادری کی فراخدلی سے میزبانی کر رہی ہے۔وزیراعظم نے امیرِ قطر کو پاکستان کے دورے کی دعوت ایک بار پھر دی۔امیرِ قطر نے رواں سال کے آخر میں پاکستان کا دورہ کرنے کی حامی بھر لی
