پاکستان میں ڈیجیٹل انقلاب کیلئے بڑا قدم ،ملک بھر میں براڈ بینڈ سروس شروع کرنے کا اعلان

اسلام آباد ( پاک ترک نیوز) پاکستان میں ڈیجیٹل انقلاب کی جانب ایک بڑا قدم، عالمی ٹیک کمپنی ایمازون کا منصوبہ پروجیکٹ کوئپر اگلے سال ملک میں سیٹلائٹ براڈ بینڈ سروسز کا آغاز کرے گا۔
تفصیلات کے مطابق وفاقی وزیر برائے آئی ٹی و ٹیلی کمیونیکیشن شزا فاطمہ خواجہ اور پروجیکٹ کوئپر کے وفد کے درمیان اہم ملاقات ہوئی جس میں پاکستان میں جدید انٹرنیٹ سروسز کے آغاز پر بات چیت کی گئی۔
وزارت آئی ٹی کے مطابق یہ منصوبہ پاکستان کے ڈیجیٹل منظرنامے میں نمایاں تبدیلی لانے کا باعث بنے گا۔
پروجیکٹ کوئپر لو ارتھ آربٹ (LEO) سیٹلائٹ ٹیکنالوجی کے ذریعے 2026 کے آخر تک پاکستان میں ہائی اسپیڈ انٹرنیٹ کی فراہمی شروع کرے گا۔
اربوں ڈالر کے اس عالمی منصوبے کا مقصد دنیا کے ان علاقوں کو بھی تیز رفتار انٹرنیٹ سے جوڑنا ہے جہاں رسائی مشکل یا ناممکن ہے۔
وفاقی وزیر شزا فاطمہ خواجہ نے کہا کہ پاکستان میں اس منصوبے کا آغاز ڈیجیٹل شمولیت کو فروغ دینے اور ملک کے کنیکٹیویٹی ایکو سسٹم کو مضبوط بنانے کی طرف ایک اہم قدم ہے۔
انہوں نے مزید کہا کہ یہ اقدام حکومت کے “ڈیجیٹل نیشن پاکستان” کے وژن سے مطابقت رکھتا ہے، جس کا مقصد ہر شہری کو — چاہے وہ کسی بھی علاقے میں ہو — تیز، سستا اور محفوظ انٹرنیٹ فراہم کرنا ہے۔
پروجیکٹ کوئپر کے تحت 3,236 سیٹلائٹس مدار میں تعینات کیے جائیں گے، جو سستے انٹرنیٹ ٹرمینلز کے ذریعے صارفین کو 400 ایم بی پی ایس تک کی رفتار فراہم کریں گے۔