بنگلا دیشی وزیراعظم کی تقریب حلف برداری، احسن اقبال ڈھاکا روانہ

ڈھاکا:(پاک ترک نیوز) پاکستان کی جانب سے وفاقی وزیر منصوبہ بندی احسن اقبال بنگلا دیش کے نئے وزیراعظم طارق رحمان کی حلف برداری میں شرکت کے لیے ڈھاکا روانہ ہو گئے ہیں۔
وزیراعظم شہباز شریف بیرون ملک مصروفیت کی وجہ سے تقریب میں شرکت نہیں کر پائیں گے، اس لیے احسن اقبال پاکستان کی نمائندگی کریں گے۔
ذرائع کے مطابق احسن اقبال اعلیٰ سطح کے حکام سے ملاقاتیں کریں گے اور دونوں ممالک کے دوستانہ تعلقات کو مضبوط بنانے، سیاسی اور اقتصادی شعبوں میں تعاون کو فروغ دینے پر تبادلہ خیال کریں گے۔
دفتر خارجہ کا کہنا ہے کہ پاکستان کی شرکت بنگلا دیش کے جمہوری عمل کی حمایت کا مظہر ہے اور یہ دونوں ممالک کے درمیان دوطرفہ تعلقات کو مزید مستحکم کرنے کے عزم کی عکاسی کرتی ہے۔
بنگلا دیش میں 17 فروری کو ہونے والی حلف برداری کی تقریب میں چین، سعودی عرب، بھارت، ترکی، یو اے ای، قطر، ملائیشیا، برونائی، سری لنکا اور نیپال سمیت متعدد ممالک کے سربراہان نے بھی شرکت کی دعوت قبول کی ہے۔
الیکشن کمیشن بنگلا دیش کے جاری کردہ سرکاری نتائج کے مطابق 299 نشستوں پر ہونے والے انتخابات میں بی این پی نے 209 نشستیں حاصل کر کے واضح برتری حاصل کی، جبکہ جماعت اسلامی 68 نشستوں کے ساتھ دوسری بڑی جماعت بنی۔ طلبہ کی جماعت این سی پی نے 6 نشستیں حاصل کیں۔