ریاض:(پاک ترک نیوز)سعودی عرب کی وزارتِ حج و عمرہ نے ناقص کارکردگی اور خدمات کے معیار میں کمی پر عمرہ سیکٹر سے وابستہ 1,800 غیر ملکی ٹریول ایجنسیوں کے معاہدے معطل کر دیے ہیں۔
وزارت کے مطابق مجموعی طور پر عمرہ خدمات فراہم کرنے والی تقریباً 5,800 ایجنسیوں میں سے ان اداروں کے خلاف کارروائی کی گئی ہے۔
وزارتِ حج و عمرہ کے اعلامیے کے مطابق یہ فیصلہ باقاعدہ دورانیہ وار جائزے (پیریاڈک ایویلیوایشن) کے بعد کیا گیا، جس میں متعدد ایجنسیوں کی کارکردگی اور سروس کو مقررہ معیار سے کم پایا گیا۔
متاثرہ ایجنسیوں کو خامیاں دور کرنے کے لیے 10 دن کی مہلت دی گئی ہے۔وزارت نے واضح کیا ہے کہ یہ معطلی صرف نئی عمرہ ویزا درخواستوں کے اجرا تک محدود ہے اور اس کا مقصد ایجنسیوں کو اپنی کارکردگی بہتر بنانے اور منظور شدہ ضوابط پر مکمل عملدرآمد کا موقع فراہم کرنا ہے۔
مقررہ مدت میں تقاضے پورے کرنے پر ایجنسیوں کے معاہدے بحال کر دیے جائیں گے۔اہم بات یہ ہے کہ جن عازمین کے پاس پہلے سے درست عمرہ ویزے موجود ہیں یا جن کی بکنگ ہو چکی ہے، ان پر اس فیصلے کا کوئی اثر نہیں پڑے گا اور عمرہ خدمات معمول کے مطابق جاری رہیں گی۔
وزارت کے ترجمان غسان النعیمی نے خبردار کیا ہے کہ جو ایجنسیاں مقررہ وقت میں اپنی خامیاں دور کرنے میں ناکام رہیں، ان کے خلاف مزید سخت ضابطہ جاتی کارروائی کی جائے گی۔
انہوں نے کہا کہ وزارت عمرہ سیکٹر کی شفافیت، اعتماد اور عازمین کے حقوق کے تحفظ کو یقینی بنانے کے لیے نگرانی اور جانچ کے نظام کو مزید مضبوط بنا رہی ہے۔
سعودی عرب کا بڑا ایکشن، ناقص کارکردگی پر 1,800 عمرہ ٹریول ایجنسیوں کے لائسنس معطل
