اسلام آباد ( پاک ترک نیوز) الیکشن کمیشن نے 42 کنٹونمنٹ بورڈز میں انتخابات سے متعلق کیس کا تحریری حکم جاری کر دیا۔ الیکشن کمیشن کے مطابق 42 کنٹونمنٹ بورڈز کی مدت 11 اپریل 2026 کو ختم ہو گئی تھی، قانون کے تحت 8 اگست تک نئے انتخابات کرانا لازم تھے، تاہم مقررہ وقت پر الیکشن نہیں ہو سکے۔تحریری حکم میں کہا گیا ہے کہ الیکشن کمیشن نے 11 جنوری 2026 کو حلقہ بندیوں کا شیڈول جاری کیا جبکہ 20 اپریل کو حلقہ بندیوں کی حتمی فہرست بھی شائع کر دی گئی تھی۔
الیکشن کمیشن کے مطابق کنٹونمنٹ ایکٹ کی دفعہ 19 ڈی کے تحت وفاقی حکومت کی باضابطہ درخواست ضروری ہے۔ اس سلسلے میں وزارت دفاع کو 14 مئی، 26 مئی اور 16 جون کو خطوط لکھے گئے جبکہ چیف الیکشن کمشنر نے 16 جولائی کو وزیراعظم کو بھی ڈی او خط ارسال کیا۔تحریری حکم کے مطابق وزارت دفاع اور ملٹری لینڈ اینڈ کنٹونمنٹس انتخابات کے لیے تیار ہیں، تاہم معاملہ وزیراعظم آفس میں زیر التوا ہے۔ وزارت دفاع نے وفاقی حکومت کو درخواست بھجوا دی ہے لیکن تاحال جواب موصول نہیں ہوا۔الیکشن کمیشن کے مطابق 10 نومبر کو بریگیڈیئر ریٹائرڈ فلک ناز اور خلیل رانا بھی پیش ہوئے۔ کمیشن نے وزیراعظم آفس کو دوبارہ خط لکھنے اور دو ہفتوں میں جواب جمع کرانے کی ہدایت کر دی۔
یہ بھی پڑھیں: مریم نواز کو پاکستان مرکزی مسلم لیگ کا لیگل نوٹس
تحریری حکم میں خبردار کیا گیا ہے کہ وزیراعظم آفس کی جانب سے جواب موصول نہ ہونے پر الیکشن کمیشن مناسب حکم جاری کرنے پر مجبور ہوگا۔ کیس کی مزید سماعت تین ہفتے بعد مقرر کر دی گئی ہے۔
