اسلام آباد (پاک ترک نیوز )اسلام آباد میں ایف آئی اے نے انسانی گردوں کی غیر قانونی پیوندکاری میں ملوث منظم گروہ کے خلاف کارروائی کرتے ہوئے پانچ افراد کو گرفتار کر لیا۔ کارروائی کے دوران 10 لاکھ روپے نقد برآمد کیے گئے، جبکہ 8 کروڑ 75 لاکھ روپے مالیت کی دو جائیدادیں منجمد اور تین گاڑیاں ضبط کر لی گئیں۔
ایف آئی اے کے مطابق ہیومن آرگن ٹرانسپلانٹیشن اتھارٹی کے تعاون سے اسلام آباد کی پی ڈبلیو ڈی سوسائٹی میں ایک مکان پر چھاپہ مارا گیا، جہاں غیر قانونی طور پر گردے کی پیوندکاری کی گئی تھی۔ اس کارروائی میں تین ملزمان کو موقع پر گرفتار کیا گیا، جبکہ دو دیگر افراد کو بعد میں حراست میں لیا گیا۔ عدالت نے ملزمان کا سات روزہ جسمانی ریمانڈ منظور کر لیا ہے۔
تحقیقات میں انکشاف ہوا کہ گردے کی پیوندکاری کے لیے مریض سے 30 لاکھ روپے وصول کیے گئے، جبکہ گردہ عطیہ کرنے والے شخص کو 4 لاکھ روپے دینے کا وعدہ کیا گیا تھا۔ اس رقم میں سے 3 لاکھ 40 ہزار روپے عطیہ کنندہ کو ملنے تھے، جبکہ 60 ہزار روپے تین ایجنٹوں میں کمیشن کے طور پر تقسیم کیے جانے تھے۔
حیران کن انکشاف یہ بھی سامنے آیا کہ ملزمان رہائشی مکانات میں بغیر قانونی طبی اسناد کے گردوں کی پیوندکاری کر رہے تھے۔ ٹشو ٹائپنگ، کراس میچ، پی آر اے اور ایچ ایل اے جیسے ضروری ٹیسٹ بھی مبینہ طور پر غیر قانونی طریقے سے کروائے جاتے تھے۔
نیٹ ورک میں ایجنٹوں کے علاوہ ڈاکٹر، نرس،بے ہوشی کی دوا دینے والا ماہر، ادویات فراہم کرنے والا، لیبارٹری ٹیسٹ کروانے والا اور ڈائیلاسز فراہم کرنے والا شخص بھی شامل تھا۔ گروہ پی ڈبلیو ڈی سوسائٹی اسلام آباد، بحریہ ٹاؤن فیز فور اور پشاور میں سرگرم تھا۔
تحقیقات کے مطابق ملزمان نے غیر قانونی پیوندکاری سے حاصل ہونے والی رقم سے اسلام آباد میں قیمتی جائیدادیں بھی خریدیں۔ ایک ملزم نے میڈیا ٹاؤن میں 10 مرلے کا مکان 6 کروڑ 25 لاکھ روپے میں خریدا، جبکہ دوسرے نے جناح گارڈن فیز ون میں 5 مرلے کا مکان ڈھائی کروڑ روپے میں خریدا۔ ایف آئی اے نے دونوں جائیدادوں کی منتقلی منجمد کر دی ہے۔
کارروائی کے دوران ایک چینگن اوشان ایکس سیون اور دو ہونڈا سِوک گاڑیاں بھی ضبط کی گئیں۔ متعلقہ اداروں نے غیر قانونی سیٹ اپ کو سیل کر دیا ہے، جبکہ ملزمان کے بینک ریکارڈ حاصل کرنے اور منی لانڈرنگ کی الگ کارروائی شروع کرنے پر بھی غور کیا جا رہا ہے۔
