واشنگٹن (پاک ترک نیوز )امریکی وزیر خارجہ مارکو روبیو نے امریکہ اور ایران کے درمیان کشیدگی کم کرنے کے لیے مختلف ممالک کی ثالثی کی کوششوں کا خیرمقدم کیا ہے۔
صحافیوں سے گفتگو کرتے ہوئے مارکو روبیو نے پاکستان کے فیلڈ مارشل عاصم منیر کے دورۂ تہران کا ذکر کیا اور کہا کہ قطر سمیت کئی ممالک ایک عرصے سے ایران کے ساتھ رابطے میں ہیں اور مختلف تجاویز پیش کرتے رہے ہیں۔
امریکی وزیر خارجہ کا کہنا تھا کہ واشنگٹن اپنے اتحادیوں اور شراکت داروں کی جانب سے ثالثی کی کوششوں کا خیرمقدم کرتا ہے۔ تاہم کسی بھی تجویز کو قبول کرنے یا اس کی منظوری دینے کا حتمی فیصلہ امریکی صدر ڈونلڈ ٹرمپ کے ہاتھ میں ہے۔
مارکو روبیو نے مزید کہا کہ صدر ٹرمپ واضح کر چکے ہیں کہ امریکہ ایسے کسی معاہدے کی حمایت نہیں کرے گا جو ایران کو مستقبل میں جوہری ہتھیار حاصل کرنے کا راستہ فراہم کرے۔
انہوں نے کہا کہ صدر ٹرمپ کے اقتدار میں رہتے ہوئے ایران جوہری ہتھیار حاصل نہیں کر سکے گا۔
