کوئٹہ ( پاک ترک نیوز) بلوچستان کے ضلع قلات اور گوادر میں سکیورٹی فورسز کی کارروائیوں کے دوران 4 دہشت گرد ہلاک ہوگئے، جبکہ گوادر میں دیسی ساختہ بم کے حملے میں پاک فوج کے میجر وجاہت وحید نے جامِ شہادت نوش کرلیا۔
پاک فوج کے شعبہ تعلقاتِ عامہ کے مطابق قلات کے علاقے جٹک آباد میں کارروائی کے دوران 4 دہشت گرد ہلاک ہوئے۔ دہشت گردوں کے ٹھکانے سے اسلحے اور گولہ بارود کی بڑی کھیپ بھی برآمد کی گئی۔دوسری جانب گوادر کے علاقے شادی کور میں دیسی ساختہ بم کے حملے میں 34 سالہ میجر وجاہت وحید شہید ہوگئے۔ شہید میجر کا تعلق لاہور سے تھا۔
یہ بھی پڑھیں: ملتان میں خوفناک ٹریفک حادثہ، کار میں سوار پانچوں افراد جاں بحق
شعبہ تعلقاتِ عامہ کے مطابق علاقے میں دہشت گردوں کے خاتمے کے لیے کلیئرنس آپریشن جاری رہیں گے، جبکہ عزمِ استحکام کے تحت دہشت گردی کے مکمل خاتمے کے لیے کارروائیاں پوری رفتار سے جاری رکھی جائیں گی۔صدرِ مملکت آصف علی زرداری نے قلات میں کامیاب کارروائیوں پر سکیورٹی فورسز کو خراجِ تحسین پیش کیا اور میجر وجاہت وحید کی عظیم قربانی کو خراجِ عقیدت پیش کیا۔ صدرِ مملکت نے شہید کے اہلِ خانہ سے دلی تعزیت اور ہمدردی کا اظہار بھی کیا۔
