پشاور (پاک ترک نیوز )پشاور میں نجی اسکول کی عمارت منہدم ہونے کے واقعے کے بعد اسکول کے مالک نے بارشوں کو حادثے کی وجہ قرار دے دیا، جبکہ محکمہ تعلیم نے عمارت کو مخدوش قرار دیتے ہوئے تحقیقات کے لیے انکوائری کمیٹی قائم کردی۔
نجی اسکول کے مالک خان محمد کے مطابق اسکول کی بنیاد ڈیڑھ سال پہلے رکھی گئی تھی اور گزشتہ کئی روز سے جاری بارشوں کے باعث یہ حادثہ پیش آیا۔
خان محمد کا کہنا ہے کہ وہ واقعے کی صبح خود متاثرہ جماعت میں گئے تھے۔ حادثے کے بعد تمام اساتذہ کو بلا کر بچوں کو نکالنے کا عمل شروع کیا گیا۔ ان کے مطابق دوسری منزل پر ایک کمرہ منہدم ہوا، جس کے باعث نیچے کے کمرے بھی گر گئے۔ متاثرہ جماعت میں تقریباً 30 بچے موجود تھے، جبکہ اسکول میں مجموعی طور پر 350 طلبہ زیرتعلیم تھے۔
دوسری جانب سیکرٹری تعلیم عنایت اللہ وسیم نے کہا ہے کہ اسکول کی عمارت مخدوش حالت میں تھی، تاہم محکمہ تعلیم کو اس حوالے سے کسی نے آگاہ نہیں کیا تھا۔
سیکرٹری تعلیم کے مطابق حادثے کی وجوہات معلوم کرنے کے لیے انکوائری کمیٹی قائم کردی گئی ہے، جبکہ سرکاری اور نجی تعلیمی اداروں کی عمارتوں کا معائنہ بھی کیا جائے گا۔
انہوں نے مزید کہا کہ حادثے میں زخمی ہونے والے بچوں کے علاج معالجے کے اخراجات حکومت برداشت کرے گی۔
