اسلام آباد(پاک ترک نیوز) پاکستان کو اکتوبر میں قطر سے مائع قدرتی گیس کا پہلا کارگو موصول ہو گیا، تاہم سردیوں میں گیس کی بلا تعطل فراہمی کے خدشات تاحال برقرار ہیں۔
ذرائع کے مطابق منگل کے روز قطر سے ایل این جی کا انتہائی ضروری جہاز پاکستان پہنچا ہے۔ موسم سرما میں ملک کی ضروریات پوری کرنے کے لیے مجموعی طور پر ایل این جی کے 24 کارگوز درکار ہوں گے۔
سردیوں میں گیس کی طلب میں نمایاں اضافے کا امکان ہے۔ سوئی ناردرن گیس پائپ لائنز لمیٹڈ کی گیس کی طلب موجودہ تقریباً 550 ملین مکعب فٹ یومیہ سے بڑھ کر 1550 ملین مکعب فٹ یومیہ تک پہنچ سکتی ہے۔
یہ بھی پڑھیں: صدر مملکت کا واشک آپریشن پر سیکیورٹی فورسز کو خراجِ تحسین، دہشت گردوں کے خلاف کارروائیاں جاری رکھنے کا عزم
طلب میں ممکنہ اضافے کے باعث گیس کی فراہمی کا نظام دباؤ کا شکار ہونے کا خدشہ ہے، جبکہ سردیوں میں گھریلو صارفین اور دیگر شعبوں کی ضروریات پوری کرنے کے لیے ایل این جی کی مسلسل فراہمی اہم ہوگی۔
