ووہان ( پاک ترک نیوز) وزیراعلیٰ سندھ مراد علی شاہ کی چینی سرمایہ کاروں کو زراعت، صنعت، جدید ٹیکنالوجی اور قابلِ تجدید توانائی کے شعبوں میں سرمایہ کاری کی دعوتوزیراعلیٰ سندھ سید مراد علی شاہ کی قیادت میں سندھ کے اعلیٰ سطحی وفد کے دورۂ چین کے دوران سندھ اور چینی صوبے ہوبئی کے درمیان تجارت، سرمایہ کاری اور اقتصادی تعاون بڑھانے پر اتفاق کیا گیا ہے، جبکہ مشترکہ منصوبوں کو آگے بڑھانے کے لیے مشترکہ ورکنگ گروپ قائم کرنے کا فیصلہ کیا گیا ہے۔ووہان میں چینی صوبے ہوبئی کے محکمہ تجارت اور چائنا کونسل فار دی پروموشن آف انٹرنیشنل ٹریڈ کے حکام سے ملاقات کے دوران وزیراعلیٰ سندھ نے چینی کمپنیوں کو سندھ میں سرمایہ کاری اور صنعتی شراکت داری قائم کرنے کی دعوت دی۔
ملاقات میں سینئر وزیر شرجیل انعام میمن، وزیر منصوبہ بندی جام خان شورو، معاون خصوصی برائے سرمایہ کاری سید قاسم نوید اور دیگر حکام بھی شریک ہوئے۔وزیراعلیٰ سندھ کا کہنا تھا کہ سندھ پاکستان کی اہم تجارتی معیشت ہے اور کراچی کی بندرگاہیں، کراچی بندرگاہ اور پورٹ قاسم سمیت پاک چین اقتصادی راہداری جنوبی ایشیا، مشرقِ وسطیٰ اور وسطی ایشیا کی منڈیوں تک رسائی کے وسیع مواقع فراہم کرتے ہیں۔مراد علی شاہ نے چینی سرمایہ کاروں کو دھابیجی، کورنگی اور خیرپور کے خصوصی اقتصادی علاقوں میں سرمایہ کاری کی دعوت دیتے ہوئے کہا کہ سندھ میں ٹیکسٹائل، زراعت، صنعتی پیداوار، اطلاعاتی ٹیکنالوجی اور قابلِ تجدید توانائی کے شعبوں میں تعاون کے وسیع امکانات موجود ہیں۔انہوں نے زرعی مشینری، ہائبرڈ بیجوں، جدید آبپاشی، کپاس کی تحقیق اور موسمیاتی تبدیلیوں سے مطابقت رکھنے والی زرعی ٹیکنالوجی میں چین کے تجربات سے فائدہ اٹھانے کی خواہش کا اظہار کیا۔ ان کا کہنا تھا کہ مصنوعی ذہانت، کلاؤڈ کمپیوٹنگ، ڈیجیٹل حکمرانی اور اسمارٹ شہروں کے شعبوں میں بھی مشترکہ منصوبے شروع کیے جا سکتے ہیں۔
یہ بھی پڑھیں: خیبرپختونخوا میں ایمرجنسی اور گورنر راج کی ، پارلیمان سے توثیق کرانے کا فیصلہ، قومی اسمبلی اور سینیٹ کے اجلاس آج طلب
وزیراعلیٰ سندھ نے ہوا اور شمسی توانائی کے منصوبوں میں چینی سرمایہ کاری کی اہمیت پر زور دیتے ہوئے کہا کہ سندھ صاف توانائی کے شعبے میں تعاون بڑھانے کے لیے تیار ہے۔معاہدے کے تحت قائم ہونے والا مشترکہ ورکنگ گروپ سرمایہ کاری کی تجاویز، تجارتی روابط اور باہمی تعاون کے منصوبوں کا جائزہ لے گا۔ سندھ کی جانب سے سید قاسم نوید جبکہ ہوبئی کی جانب سے ڈائریکٹر جنرل لونگ شیاؤہونگ اس گروپ کی سربراہی کریں گے۔مراد علی شاہ نے چائنا کونسل فار دی پروموشن آف انٹرنیشنل ٹریڈ ہوبئی کو آئندہ سال کراچی میں کاروباری وفد بھیجنے کی دعوت بھی دی۔ دونوں جانب سے تجارتی نمائشوں، کاروباری میلوں، برقی تجارت اور جامعات و تحقیقی اداروں کے درمیان روابط بڑھانے پر بھی تبادلہ خیال کیا گیا۔
وزیراعلیٰ سندھ نے کہا کہ پاکستان اور چین کے سفارتی تعلقات کے پچھتر سال مکمل ہونے کے موقع پر صوبائی سطح پر اقتصادی شراکت داری کو مزید مضبوط بنانے کا اہم موقع موجود ہے۔
