اسلام آباد(پاک ترک نیوز ) وفاقی حکومت نے خیبر پختونخوا میں پاک فوج تعینات کرنے کا نوٹیفکیشن جاری کر دیا ہے۔ وزارت داخلہ کے مطابق فوج کی تعیناتی آئین کے آرٹیکل 245 کے تحت کی گئی ہے، جس کا مقصد صوبائی انتظامیہ کی معاونت اور شہریوں کی جان و مال کا تحفظ یقینی بنانا ہے۔
نوٹیفکیشن کے مطابق پاک فوج شہریوں کی جان و مال اور سرکاری تنصیبات کی حفاظت کی ذمہ دار ہوگی۔ فوج کی تعیناتی 11 اکتوبر 2026 کو نافذ کی گئی ایمرجنسی کی مدت تک برقرار رہے گی۔
اعلامیے میں کہا گیا ہے کہ گورنر خیبر پختونخوا، جنرل ہیڈکوارٹرز سے مشاورت کے بعد تعینات کیے جانے والے فوجی دستوں کی تعداد کا تعین کریں گے۔ اس سلسلے میں فوج کے شعبہ ملٹری آپریشنز کے ساتھ مل کر نفری کا فیصلہ کیا جائے گا۔
وزارت داخلہ کے مطابق پاک فوج کی تعیناتی کا حکم نامہ آئندہ گزٹ آف پاکستان کے حصہ دوم میں شائع کیا جائے گا۔
