پشاور(پاک ترک نیوز ) وزیراعلیٰ خیبرپختونخوا محمد سہیل آفریدی نے پشاور کے عوام کے نام اہم پیغام جاری کرتے ہوئے کہا ہے کہ آج دوپہر 2 بجے حیات آباد انڈر پاس سے لانگ مارچ کے اگلے مرحلے کا آغاز ہوگا۔
وزیراعلیٰ سہیل آفریدی نے پشاور کے عوام سے اپیل کی کہ وہ بھرپور تعداد میں باہر نکلیں اور دنیا کو پیغام دیں کہ پشاور عمران خان کے ساتھ تھا، ساتھ ہے اور ساتھ رہے گا۔
انہوں نے کہا کہ خیبرپختونخوا میں دوبارہ بدامنی، دہشت گردی اور خونریزی کا راستہ کھولنے والی کوئی پالیسی قبول نہیں کی جائے گی۔
سہیل آفریدی کا کہنا تھا کہ خیبرپختونخوا کے عوام کے مستقبل کے فیصلے بند کمروں میں نہیں بلکہ عوامی امنگوں کے مطابق ہونے چاہئیں۔
وزیراعلیٰ نے کہا کہ پشاور ہمارا دارالحکومت اور پھولوں کا شہر ہے، اسے دوبارہ بارود، گولیوں اور دھماکوں کی نذر نہیں ہونے دیں گے۔
انہوں نے تمام پشاوریوں سے لانگ مارچ میں بھرپور شرکت اور عمران خان کے ساتھ یکجہتی کے اظہار کی اپیل بھی کی۔
