راولپنڈی(پاک ترک نیوز ) ڈائریکٹر جنرل آئی ایس پی آر لیفٹیننٹ جنرل احمد شریف چودھری نے تصدیق کی ہے کہ پاکستانی فوجی دستے کئی دہائیوں سے سعودی عرب میں موجود ہیں اور مختلف شعبوں میں اپنی ذمہ داریاں انجام دے رہے ہیں۔
سی این این کو انٹرویو میں ڈی جی آئی ایس پی آر نے کہا کہ پاکستان اور سعودی عرب کے درمیان دفاعی تعلقات کئی دہائیوں پر محیط ہیں، جبکہ پاکستانی فوجی اہلکار مختلف صلاحیتوں اور شعبوں کے ساتھ سعودی عرب میں پہلے سے موجود ہیں۔
لیفٹیننٹ جنرل احمد شریف چودھری کے مطابق سعودی عرب میں پاکستانی فوجی موجودگی حالیہ قائم ہونے والے مکہ دفاعی اتحاد کے نتیجے میں نہیں ہوئی بلکہ دونوں ممالک کے درمیان طویل عرصے سے جاری دفاعی تعاون کا حصہ ہے۔
انہوں نے کہا کہ مکہ دفاعی اتحاد کسی خلا میں قائم نہیں ہوا، پاکستان، سعودی عرب اور ترکیہ کے درمیان سفارتی، سیاسی، فوجی اور عوامی سطح پر دیرینہ تعلقات موجود ہیں۔
ڈی جی آئی ایس پی آر نے واضح کیا کہ مکہ معاہدے کے تحت سعودی عرب میں موجود پاکستانی دستے مختلف شعبوں سے تعلق رکھتے ہیں اور ان کی ذمہ داریوں میں تربیت، مشاورت اور دیگر دفاعی امور شامل ہیں۔ تاہم انہوں نے سعودی عرب میں موجود پاکستانی فوجیوں کی مجموعی تعداد یا تعیناتی کی مکمل تفصیلات نہیں بتائیں۔
