لاہور( پاک ترک نیوز) سوچیے! بھوک لگی، موبائل اٹھایا، کھانے کا آرڈر دیا۔۔۔ اور چند ہی منٹ بعد دروازہ کھولیں تو ڈلیوری بوائے کے بجائے آسمان سے آپ کا کھانا اتر رہا ہو!جی ہاں! مستقبل کی یہ فلم اب حقیقت بننے جا رہی ہے، امریکا میں ڈور ڈیش نے ایسا ڈرون تیار کرلیا ہے جو کھانا اوسطاً پانچ منٹ سے بھی کم وقت میں صارف تک پہنچانے کا دعویٰ کر رہا ہے۔
کھانا منگوایا۔۔۔ اور چند منٹ بعد ڈرون گھر کے اوپر!ڈور ڈیش نے فضائی ترسیل کے لیے چھ پروں والا خصوصی ڈرون متعارف کرا دیا ہے، جس کے ذریعے شمالی کیلیفورنیا میں آزمائشی طور پر کھانے کی ترسیل شروع کی جائے گی۔
چپوٹلے اور پاپائیز سمیت کئی معروف ریستوران بھی اس منصوبے کا حصہ ہوں گے۔کمپنی کے مطابق تقریباً 80 فیصد کھانے کے آرڈر وزن کے لحاظ سے ڈرون کے ذریعے پہنچائے جا سکتے ہیں، جبکہ ابتدائی تجربات میں آرڈر پانچ منٹ سے بھی کم وقت میں پہنچانے کے نتائج سامنے آئے ہیں۔لیکن یہ ڈرون آپ کے دروازے پر اترے گا نہیں۔۔۔ بلکہ آسمان سے کھانے کا پیکٹ نیچے اتارے گا اور پلک جھپکتے ہی واپس اڑ جائے گا!ہنگامی صورتحال سے نمٹنے کے لیے ڈرون میں حفاظتی نظام بھی نصب کیا جائے گا۔مگر جہاں ایک طرف چند منٹ میں کھانا پہنچانے کا خواب دکھائی دے رہا ہے، وہیں دوسری طرف ڈرون کا شور لوگوں کے لیے دردِ سر بن گیا ہے۔ٹیکساس کے شہر رچرڈسن میں ایمیزون کے ڈرون پہلے ہی شہریوں کی شکایات کا سامنا کر رہے ہیں۔رہائشیوں کے مطابق روزانہ درجنوں ڈرون گھروں کے اوپر سے گزرتے ہیں اور مسلسل بھنبھناہٹ نے زندگی اجیرن کردی ہے۔
یہ بھی پڑھیں: آبنائے ہرمز کی صورتحال، پاکستان کا قطر سے اکتوبر میں ایل این جی کے 3 کارگو لینے کا فیصلہ
بعض شہریوں نے ڈرون کی آواز کو فضا میں اڑتی ہوئی گھاس کاٹنے والی مشین سے تشبیہ دے دی۔اب سوال یہ ہے۔۔۔ کیا مستقبل میں کھانا لانے کے لیے ڈلیوری رائیڈر کا انتظار ختم ہوجائے گا؟یا پھر آسمان سے برسنے والے ڈرون۔۔۔ تیز تر کھانے کے ساتھ شور، حادثات اور رازداری جیسے نئے مسائل بھی گھروں تک پہنچائیں گے؟ایک طرف پانچ منٹ میں کھانا۔۔۔ دوسری طرف آسمان پر ڈرونز کا شور۔۔۔ مستقبل کی ڈلیوری اب زمین سے اٹھ کر آسمان تک پہنچ چکی ہے!
