استنبول (پاک ترک نیوز )ترکیہ بلغاریہ کی سرحد تک اپنے تیز رفتار ریلوے نیٹ ورک کو توسیع دینے جا رہا ہے، ہلالی۔کاپیکولے تیز رفتار ریلوے لائن کے 153 کلومیٹر طویل چرکزکوی۔کاپیکولے حصے کا افتتاح 9 اکتوبر کو ہوگا۔ترکیہ کے وزیر ٹرانسپورٹ و انفراسٹرکچر عبدالقادر اورال اوغلو کے مطابق صدر رجب طیب اردوان افتتاحی تقریب میں شرکت کریں گے۔ منصوبے کا یہ حصہ ہلالی۔کاپیکولے ریلوے لائن کا سب سے طویل حصہ ہے اور مسافر و مال بردار ٹرینوں دونوں کے لیے تیار ہے۔
ریلوے لائن پر ٹرینیں 200 کلومیٹر فی گھنٹہ تک کی رفتار سے چل سکیں گی۔ دوہری پٹڑی اور بجلی سے چلنے والے اس حصے میں 31 پل، 8 سرنگیں، 2 بلند گزرگاہیں، 114 انڈر پاس اور اوور پاس جبکہ 175 پانی گزار راستے تعمیر کیے گئے ہیں۔منصوبے کے تحت مجموعی طور پر 353 کلومیٹر ریلوے پٹڑی بچھائی گئی ہے۔ منصوبہ مکمل ہونے کے بعد ہلالی سے کاپیکولے تک سفر کا دورانیہ 4 گھنٹے سے کم ہو کر صرف ڈیڑھ گھنٹہ رہ جائے گا، جبکہ مال بردار ٹرینوں کا سفر 8 گھنٹے 30 منٹ سے کم ہو کر ساڑھے 3 گھنٹے رہ جائے گا۔ترکیہ کے وزیر ٹرانسپورٹ کے مطابق ریلوے کی گنجائش میں چار گنا اضافہ ہوگا۔ سالانہ مسافر گنجائش 6 لاکھ سے بڑھ کر تقریباً 30 لاکھ جبکہ مال برداری کی گنجائش 15 لاکھ ٹن سے بڑھ کر 95 لاکھ ٹن سالانہ ہوجائے گی۔
منصوبے سے استنبول، کوجالی، تکیرداغ اور وسیع تر تھریس خطے کے صنعتی علاقوں اور بندرگاہوں کو یورپی منڈیوں تک رسائی بہتر بنانے میں مدد ملے گی۔ حکام کے مطابق 2024 میں ترکیہ کی ریل کے ذریعے ہونے والی برآمدات میں سے 86 فیصد اسی راہداری سے یورپ منتقل ہوئیں۔منصوبے کے تحت کاپیکولے ریلوے اسٹیشن کے بنیادی ڈھانچے کو بھی وسعت دی جا رہی ہے۔ اسٹیشن پر ریلوے پٹڑیوں کی تعداد 23 سے بڑھا کر 42 جبکہ مجموعی پٹڑی کی لمبائی 14 ہزار 840 میٹر سے بڑھا کر 29 ہزار 680 میٹر کی جائے گی۔کاپیکولے اور بلغاریہ کی سرحد کے درمیان تقریباً 2.4 کلومیٹر ریلوے حصے کو بھی دوہری پٹڑی میں تبدیل کیا جائے گا۔
یہ بھی پڑھیں: حوثیوں کا ریاض کے ایئرپورٹ اور آرامکو ریفائنری کو نشانہ بنانے کا دعویٰ
ترکیہ کے مطابق توسیع شدہ بنیادی ڈھانچے سے ٹرینوں کی آمد و رفت اور ترتیب دینے کی صلاحیت بڑھے گی، کسٹمز اور معائنے کے مراحل تیز ہوں گے جبکہ سرحد پر انتظار کا وقت کم ہوگا۔عبدالقادر اورال اوغلو نے ہلالی۔کاپیکولے ریلوے لائن کو یورپی راہداری کے لیے اہم دروازہ قرار دیتے ہوئے کہا کہ یہ منصوبہ ترکیہ کو یورپی ریلوے نیٹ ورک سے جوڑنے والی درمیانی راہداری کو مزید مضبوط کرے گا۔یہ ریلوے راستہ عراق کی الفاو بندرگاہ کو ترکیہ کے ذریعے یورپ سے ملانے کے لیے زیرِ منصوبہ ترقیاتی راہداری کے مغربی سرے کا حصہ بھی ہے۔
منصوبے کے دیگر حصوں، یعنی اسپارتاکولے۔چرکزکوی اور اسپارتاکولے۔ہلالی حصوں پر تعمیراتی کام جاری ہے۔ تمام حصے مکمل ہونے کے بعد ترکیہ کو یورپ اور ایشیا کے درمیان مسافر اور مال بردار ریلوے رابطوں میں مزید اہم کردار ادا کرنے کی توقع ہے۔
