اسلام آباد ( پاک ترک نیوز) پاکستان نے بھارتی بارڈر سیکیورٹی فورس کی جانب سے دو پاکستانی شہریوں کے قتل پر بھارت سے شدید احتجاج کیا ہے۔
ترجمان دفتر خارجہ کے مطابق بھارتی ناظم الامور کو دفتر خارجہ طلب کیا گیا اور 2 اکتوبر کو بین الاقوامی سرحد پر بدیان سیکٹر میں دو پاکستانی شہریوں کے قتل پر شدید احتجاج ریکارڈ کرایا گیا۔ترجمان کے مطابق بھارتی بارڈر سیکیورٹی فورس کے اہلکاروں نے نہتے پاکستانی شہریوں کے خلاف بلااشتعال ہلاکت خیز طاقت کا استعمال کیا۔
دفتر خارجہ کا کہنا ہے کہ نہتے شہریوں کے خلاف طاقت کا استعمال مکمل طور پر بلاجواز اور انتہائی غیر متناسب تھا، جس کے نتیجے میں دو قیمتی انسانی جانیں ضائع ہوئیں۔ترجمان نے کہا کہ پاکستان جاں بحق شہریوں کو درانداز قرار دینے کی کسی بھی کوشش کو واضح طور پر مسترد کرتا ہے۔دفتر خارجہ کے مطابق واقعہ بنیادی انسانی حقوق کی سنگین خلاف ورزی ہے اور اس نے بین الاقوامی قانون کے تحت شہریوں کی جان کے تحفظ سے متعلق سنگین خدشات پیدا کیے ہیں۔پاکستان نے بھارت سے مطالبہ کیا ہے کہ واقعے کی فوری، شفاف اور قابلِ اعتماد تحقیقات کی جائیں اور ذمہ دار افراد کے خلاف مناسب محکمانہ اور قانونی کارروائی عمل میں لائی جائے۔
یہ بھی پڑھیں: امریکی اعلیٰ حکام کا ایران اور یمن پر خفیہ مشاورتی اجلاس
ترجمان دفتر خارجہ کے مطابق بھارتی حکومت پاکستان کو تحقیقات کے نتائج اور کی گئی کارروائی سے باضابطہ طور پر آگاہ کرے۔پاکستان نے بھارت پر زور دیا ہے کہ وہ بنیادی انسانی حقوق اور بین الاقوامی قانون کے احترام کو یقینی بنائے، متعلقہ دوطرفہ انتظامات اور طے شدہ سرحدی طریقہ کار پر سختی سے عمل کرے۔دفتر خارجہ نے کہا کہ ایسے حالات سے نمٹنے کے لیے بھارت زیادہ سے زیادہ تحمل کا مظاہرہ کرے اور مستقبل میں ایسے واقعات کی روک تھام کے لیے مؤثر اقدامات کرے۔
